O le galuega a loia e lē o se galuega faigofie. E lē gata i le tele o tausaga e aoga ai faato‘ā maua tusi e mafai ai ona faigaluega faaloia, ae o le tele o lavelave e feagai ma le loia i le taumafai e fesoasoani i se tagata e sulu mai i se fesoasoani.
Afai e ave se mataupu i le fale faamasino sili (HIgh Court), e lē gata i le totogi o le loia, o le GST a le malo, o le totogi o suesuega ma tusitusiga o pepa e ave e faila i le fale faamasino ae lei tu le loia i luma o le fale faamasino.
O le totogi o le failaina o pepa i le fale faamasino. E totogi foi le fale faamasino. Afai ae faiaina, e totogi e lē ua faiaina le totogi o le loia ma tupe na alu a le isi itu lea na su e oe, ae ua e faiaina.
E pei le galuega a le loia o lou susū i le Supermarket. E leai se Supermarket i Niu Sila poo Samoa e te susū atu i le Supermarket, taumafa oloa o le faleoloa ona e laulelei lea e fai i le faatauoloa se‘i togitogi atu le pili o oloa ua uma ona e taumafaina i se taimi mulimuli. Na o le mea e loka ai loa oe e leoleo i totonu o le Supermarket.
Ona o le faaiuga o le financial year (tausaga faaletupe a le malo) le aso mulimuli o Mati i tausaga uma, o lea foi ua toe alu tupe a loia e ave ai tagi i le tulafono e totogi mai tupe o galuega ua uma ona fai, ae ua lē faamaoni tagata e totogi mai pili.
E faanoanoa ai ona e lē o ni tulaga ia e tatau ona uia e ni tagata e sulu mai i le fesoasoani ma faliu atu le loia fai le galuega na talosagaina.
O le tele lava e fia pule mai le client e faapea e togitogi mai le aitalafu, ae tele lava ina lē faamaoni e totogi faauma se aitalafu o iai.
O le ofisa o le loia e totogi mea uma. E amata mai i tagata faigaluega, moli, pepa e faaaogā, telefoni fax, aemaise le taleni ma le iloa, na a‘oina i tausaga e tele, faato‘ā mafai ona galuega faaloia.
Ona ua tele le lē faamaoni o o tatou tagata i feagaiga ma loia i le totogiina o pili a loia mo galuegafai, ua lāgā ai le mataupu lenei:
O le auna o lenei tusitusiga, o le fia fautua atu i le lautele e aua lē o i loia pe a lē gafatia tupe e totogi ai le galuega a le loia.
Ia silafia e eseese loia. E lē faatusaina le totogi o le loia faataitai ma le loia ua ova i le 20 tausaga o faigaluega ma iloa mataupu eseese e tatau ona tāpā ma faaaogā ina ia maua se iuga lelei o se faafitauli ua tulai mai.
Fesili i le loia pe lava lona tomai i le mataupu lea e te fia maua ai le fesoasoani, i lo lou fia faamisa i le isi itu ae lē lava le tupe e totogi ai le faiga o se faamasinoga, pe a faaauau i le iuga.
O le toatele, e o i loia ona o le mananao e ave se tagi faasaga i se isi itu, ae tainane lava e iloa e lē gafatia le galuega a le loia, ae finau valea lava ma lē faalogo i se fautuaga a le loia, e o e soalaupule i tua se mataupu ma teuteu ma faalelei se mataupu o tulai mai.
O faafitauli uma lava e sulu mai ai tagata i lenei ofisa loia, o mea e lē tatau ona faaletonu, ae ua ala ona faaletonu, o le tasaini o pepa i se taimi na amata ai se mataupu, ae lē o malamalama i upu tusitusia i pepa la na saini.
O se isi faataitaiga, o le lē talanoaina e mātua ma fanau uma i se taimi e tasi se mea o loo mananao ai mātua e fai pe a oo mai le valaau a le Atua.
O le tele o mea o loo tutupu mai o le uma atu o le ola o mātua ae tauaimisa fanau, ma aveese toatasi mea totino a mātua ae leai se mea a isi o le fanau.
O mea tau Ekalesia, o le tele o le lē malamalama i tulafono a Niu Sila e opogi ai galuega a lotu.
Ia silafia, o loia e ave atu ai le faatonuga o tupe totogi i galuegafai. E lē pule mai le client i se taimi o i luma, i le fai mai se‘i togitogi mai le tupe.
A leai se feagaiga tusitusia na malie i ai le loia i se taimi muamua e togitogi mai se pili, e lē pule oe ma fai faasamoa le totogiina o galuegafai a loia.
Manatua e lē mafai ona e susū i se Supermarket, taumafa oloa o le faleoloa ae mulimuli e sau i le counter e aioi i le faatauoloa se‘i togitogi atu oloa ua uma ona taumafa.
E faapena le totogi o galuega e alu ai le afu o le loia e taumafai mo oe.
