E tolu lelei aso o le vaiaso na tea nei na potopoto ai i latou ua silafia e le atunuu i Samoa i tomai faaleaganuu ua faamanuiaina ai.
O le potopoto o nei taitai o le atunuu i le tulaga o tu ma aganuu ina ia soalaupule faatasi ma le Matagaluega o Aoga, Taaloga ma Aganuu faapea le lālā o a‘oa‘oga ma aganuu a Malo Aufaatasi, le UNESCO, ni auala e mafai ai ona puipui ‘oa faaleaganuu poo tomai faa-Samoa e lē faitino poo mafaufauga ua mafai ai ona tuufaasolo mai nisi o ‘oa a le atunuu.
Tomai i tala tuufaasolo, o siva, o fatuga o pese, o tomai fau vaa, tomai fau fale, tomai ta tatau aemaise i latou o loo malosi i le atina‘e o faiva alofilima ua malilie uma e tatau lava ona iai ni puipuiga aloaia o o latou iloa tuufaasolo mai mo le faaauau ai ona maua e tupulaga o le lumanai ia tomai.
O i latou na valaaulia e folasia o latou iloa i nei ‘oa faaleaganuu na oo atu uma i le Maota o le SCOPA i Vaivase-tai auā le folasia o o latou tomai, le tulaga o iai i le taimi nei ia tomai, ma taumafaiga ina ia faaauau le tuufaasolo atu i tupulaga talavou o ia tomai ma ia iloa.
“O measina a Samoa e tuugutu ma tuufaasolo mai e tuaa agai i fanau, ma e moomia lava auala e puipuia ai,” o le finagalo lea o le sui o le Matagaluega o Aoga, Taaloga ma Aganuu lea na faatautaia faatasi ma le UNESCO lenei fonotaga faaleaoaoga.
Faaalia e Mose Fulu, o le taimi lenei o loo iai le manaoga o le UNESCO ina ia sainia e malo o le faalapotopotoga o Malo Aufaatasi, lea e aofia ai Samoa se Maliega e Puipuia ai nei ituaiga tomai ma ‘oa faaleaganuu o loo vaaia pea le faatinoga i le taimi nei.
Faaalia e Mose Fulu ua leva ona taumafai mai le UNESCO i lona lālā o loo vaaia tu ma aganuu a atunuu o le lalolagi ina ia faamautu puipuiga nei.
Ua mautu i Samoa tulafono e faamalosia ai le pulea o tomai eseese. E lē gata i lea ua mautu foi tulafono i Samoa ina ia mafai ai ona faamautu i latou e mafua mai ai tomai e pei o pese, o mamanu o elei faapea isi oloa ae o le tulafono lenei o loo tau faamautu, e mo ‘oa e lē faitino poo mafaufauga ua ala mai ai tomai eseese ma ‘oa faaleaganuu nei.
Faaalia e le sui o le Komisi o loo iloiloina tulafono a le atunuu, Houlton Faasau, e tele lava le galuega ua vaavaai i ai le Komisi lenei i le mautinoa ai e puipuia nei vaega tāua o tu ma aganuu a Samoa, ma e toe o ni nai masina ona vaaia loa lea o faatalatalanoaga o le a faatautaia e le Komisi ina ia ao mai ai faamaumauga ma manatu o le atunuu i le tulaga o iai le manaoga o vaega taitasi.
Ua aoina nei finagalo faaalia ma faatalatalanoa ai ma se lipoti ina ia mafai ona tuu atu i le Malo mo le faamaonia o le Maliega, ma amata ai loa ona faagaioi i Samoa le faatinoga o tulafono patino mo ‘oa faaleaganuu e lē faitino.
