Ua faamautu mai e le tamaitai Sui Ofisa Sili Lagolago o le Ofisa o Faigafaiva o Joyce Samuelu Ah-Leong, o loo iai vaega o le gataifale i Samoa e maua ai i‘a oona ma o loo faia pea suesuega ina ia mafai ai ona faamautu nofoaga o tele ai lea limu.
Ta‘ua e lenei tamaitai e faigata tele ona suesue atoa gataifale o Samoa, e ui o le manaoga tele lea o le Ofisa o Faigafaiva, ae o le alia‘e mai pea o le numera o tagata ua onanā ona o le taumafa ai o nisi o i‘a ua faamautu ai lava le manaoga o le Ofisa ina ia faaauau pea a latou suesuega.
O le siama lea e faaigoaina o le ciquaterra, e pipii i le limu ona ‘ai lea e tamai i‘a. O le faaauau ai o le gasologa o le soifuaga o le gataifale, e mae‘a ona ‘ai e i‘a laiti le limu, ona ‘ai lea e i‘a lapopoa ma taumafa mulimuli ane e tagata, maua ai loa le faafitauli lea.
“E lē aafia lava i‘a pe a o latou aia le limu lea e iai le siama oona, peitai e aafia ai tatou nei e faaaogāina i‘a”.
O le vaiaso na tea nei e toafā ni alii na taofia ma togafitia i le falemai tele i Motootua ina ua onanā i i‘a. O le faamatalaga mai ia Joyce, o loo faatali se lipoti mai i le Soifua Maloloina i lea mataupu peitai e lē o manino lava poo fea nuu e o mai ai le toafā lea, auā e eseese uma lava nuu e o mai ai.
O le faatuputupulaia o le numera o tagata ua onanā i i‘a na ta‘ua e Joyce ua toatele foi i latou ua lē malamalama i i‘a o le gataifale.
“O se suesuega na faia e le Ofisa o Faigafaiva i tausaga ua mavae na maua ai o le toatele o tagata Samoa, sa iloa lelei lava le i‘a e oona, ma le nofoaga e lē tatau ona taumafaina i‘a o loo maua ai, e pei o se faataitaiga o le gataifale o Siumu e iai lava i‘a oona.
O le i‘a foi lea o le mu e iloa uma lava e le toatele e oona ma e faasā ona faatau le mu i le maketi o i‘a,” o se faamalamalamaga lea mai i le tamaitai Sui Ofisa Sili Lagolago.
“O le iai la o siama oona nei e mafai ona faalautele atu ai i‘a oona e maua i le sami ma faigata ai ona faasino sa‘o lava se suesuega i se ogasami e tasi.
Ae o suesuega ua faia e le matou ofisa ua maua ai o le itu lea e iai ogasami o Lefaga aemaise i gataifale o Matafaa ua maua ai limu ia e aafia mai ai tagata e toafā e pei ona ta‘ua”.
Ta‘ua foi e Joyce, e iai foi isi siama oona e mafai ona maua i gataifale o Samoa, peitai o le ciquaterra lava le siama aupito taatele atu lona sosolo i gataifale o le atunuu.
O le faamatalaga a lenei tamaitai suesue, maimau pe ana lava meafaigaluega e faatino ai e le Ofisa suesuega o gataifale uma o le atunuu ae e lē mafai lea tulaga.
Ona pau la le galuega ua faatino nei o le saga faalauiloa o le tulaga o iai le siama lenei ma le aafiaga o tagata pe a taumafa i‘a e oona.
“E tāua le silafia e Samoa o le faafitauli auā e taumafa i‘a o tatou tagata, ma atonu o le a maua se fesoasoani e mafai ai ona fai se faiga e taofi ai le siama lenei.
E lē sosolo, ae e iai taimi e vaaia ai le siama, iai foi taimi e toe mou ese ai e pei o le flu, ae e tele foi ina tulai mai lenei siama oona pe a mae‘a faalavelave faalenatura e aafia ai le sami, pei o mafui‘e ma galulolo, ma atonu o le mafuaaga foi lea ua vaaia ai le toe olaola mai o le ciquaterra ona na amata vaaia lava i le mae‘a ai o le sunami ma mafui‘e i le tausaga na tea nei”.
