O le vaiaso mulimuli o le masina lenei e faatautaia ai se faaaliga tele o oloa e gaosi ma totō mai i Samoa i le aai o Sini i Ausetalia. O se faaaliga o lea ua ta‘ua e oo atu i le 40 oloa eseese o le a faalauiloa ai ma le faamoemoe ina ia mafai ona maua ni maketi i Ausetalia e faatau ai i le lumanai.
O le faamoemoe foi o le Asosi o Gaosi oloa ma le au faatau oloa i atunuu i fafo le SAME ina ia mafai ona siitia le tupe a le atunuu e maua mai i ana oloa faatau i fafo (export products).
O se tasi o ia oloa o le talo ua tuu tagapepa ma ua faa‘aisa (frozen taro).
O le talo le oloa aupito maualuga le alu i Niu Sila talu mai le faaaliga lea na faia i le tausaga na tea nei ma ua faasolosolo manuia lava le siisii o le numera o uta ua faatau i Niu Sila talu mai le faaaliga tele lea.
O le faigata o le maketi a Ausetalia ona o lea e lei talia lava e le Ofisa o le faaāsu a lea atunuu le talo mai i Samoa talu mai le lega lea na faaleaga ai le talo i le silia i le 20 tausaga talu ai.
O lea la e tālia se suesuega ua toe tapa e Ausetalia ina ia mautinoa le lelei atoatoa o lea fua o faaeleeleaga mai Samoa.
O loo faatautaia e se kamupani o faatoaga a Niu Sila faatasi ai ma le SAME ma le lagolago a le Matagaluega o Faatoaga ma Faigafaiva a Samoa lea suesuega ina ia avatu ai se lipoti i le Matagaluega o Faatoaga ma le Faaāsu a Ausetalia mo le iloiloga o le toe avatu o le talo mai i Samoa i lea atunuu.
O loo tatala mai le avanoa mo talo e faamamā ma tuu aisa.
O loo maua le talo lenei mai Fiti ma o le lipoti na aumai e oo atu i le $150,000 (tala Amerika) le tupe e maua e Fiti i le tausaga mai i talo tuu aisa nei ma o le amataga la o le faaaliga faalauiloa i le faaiuga o le masina lenei ua fuafua ai ma le avatu o le talo tuu aisa mai i Samoa nei.
O le vaavaai mamao lava ina ia mafai ona avatu le talo i Ausetalia e pei o le talo lea e avatu i Niu Sila peitai o le amataga ua agai ai e ave le talo tuu aisa mo lea maketi.
