Ua iai le tulafono i Samoa e faamalosia ai le ave o fanau i le aoga. Peitai e iai fanau o loo vaaia pea e lē agai i aoga.
O fanau foi ua aafia i ni sauāga o le tino ma le mfaufau ona o feusuaiga fai faamalosi ma faaoolima matagā, ua faigata ona alu i le aoga ona o aafiaga o le mafaufau.
O le pitolaau lea o loo feagai nei ma se isi faalapotopotoga tuma‘oti le Samoa Victim Support Group.
O le tausaga ua mavae na faavaeina ai le vaega laiti o sui lagolago o le Faalapotopotoga mo le Toomaga mo Tagata Puapuagatia, le Samoa Victim Support Group juniors.
O le faamoemoe autū o lea itutino o le faalapotopotoga autū, ia maua le avanoa e alii ma tamaitai talavou o loo lagolagoina galuega fesoasoani a le Toomaga e faatino ai nisi polokalame.
O fanau e silia i le 20 mai le matua o le 3 tausaga i le 15 ua amata ai se polokalame fou a le faalapotopotoga, o le aoga i le aiga poo le Home School.
O le maota faamasino tuai i Apia i le vaega sa iai le faamasinoga faaitumalo ua faaaogāina nei mo a‘oa‘oga a lea vaega o le fanau, ma o loo faaaogā i ai nisi ua ofo le latou fesoasoani e faia fua e aunoa ma se totogi e a‘oa‘oina tamaiti.
O tupe le autū o galuega mo soo se faalapotopotoga tuma‘oti ma o le mafuaaga lea na taloina ai se feiloaiga a sui o le komiti faafoe o le SVSG Juniors ma tusitala mo le faalauiloaina o le latou suegatupe e ala i se uokafoni. Faaalia e le Peresitene o le SVSG Juniors o Nathan Ryan, o se latou suesuega ma se sailiiliga na iloa ai le toatele o fanau laiti i le aunuu e lē o aooga ma o mafuaaga lava o le lē gafatia e mātua ona totogi pili.
O fanau ia o loo fia tuuina i le polokalame ua amatalia lea ua ave i ai fanau e to‘a 20 o loo i lalo o le vaavaaiga a le Toomaga. O ia fanau na aafia i ni faiga solitulafono a o latou mātua ma tagata matutua a o latou aiga.
O nisi foi o tamaiti o alo ma fanau a le ulugalii ua faasala soloatoa i le falepuipui i le faaoolima i se tasi o a la tama teine ua maliu.
O loo galulue faatasi le polokalame a le SVSG Juniors ma le Matagaluega o Aoga a le Malo, ma na faaalia e le peresitene i le feiloaiga ma tusitala, o loo lagolagoina e le matagaluega le latou polokalame. Faaalia e Nathan Ryan o le taimi lava e iloa ai ua lelei se tamaitiiti i le tulaga o le tusitusi ma le faitau tusi ona saili loa lea o se aoga e faaauau ai ana a‘oa‘oga. O lona uiga e lē o se taimi atoa o le olaga o le tamaitiiti e a‘oa‘oina ai i le Home School.
O loo taumafai le polokalame e faalautele atu i le atunuu lenei fesoasoani ina ia maua ai e fanau uma a Samoa le ola a‘oa‘oina.
