E toatele nisi o tamā ma tina matutua ua lē agavaa mo le penisione a Niu Sila e ui ua avea i latou ma sitiseni Niu Sila.
E mafua ona lē agavaa mo le penisione a Niu Sila talu ai e lē o nofomau i se nofoaga e tasi i Niu Sila, ae o loo faimalaga solo i le va o Niu Sila ma Samoa faapea foi ona asiasi i aiga ma fanau i Ausetalia. Ona oo lea i le taimi e talosagaina ai le maua o le penisione ina ua atoa le 65 tausaga o le matua, ae tali mai le matagaluega o le WINZ, e lē agavaa mo le faamanuiaga o le penisione.
O le tulafono lava ia e faatatau i le maua o le penisione a Niu Sila mo tagata ua aulia le 65 tausaga le matutua, e tatau lava ona atoa le 10 tausaga o nofomau i Niu Sila mai le atoaga o le 20 tausaga o lou matua. O le isi itu o loo faapea mai le tulafono, ia atoa lelei le 5 tausaga o e nofomau i Niu Sila mai le taimi na atoa ai le 50 tausaga o lou matua.
O le faafitauli o loo aliali mai pea, o loo iai nisi o tamā ma tina matutua, e ui ua tele tausaga o avea ma sitiseni Niu Sila, ae na maua loa le sitiseni Niu Sila malaga loa ma nofomau i aiga i Samoa.
Faato‘ā toe foi mai lava i Niu Sila e talosaga le penisione ina ua atoa le 65 tausaga o lona matua. O lea talosaga ua teena e le matagaluega a WINZ talu ai e lei atoa le 5 tausaga o nofomau i Niu Sila mai le taimi na atoa ai le 50 tausaga o le matua. Ua iai foi nisi o tamā ma tina matutua, faato‘ā maua le sitiseni ma nofomau loa i Niu Sila ae ua atoa le 65 tausaga o le matua. E fai atu le talosaga i le matagaluega a le Malo, ae teena se‘i vaganā ua atoa le 5 tausaga o nofomau i Niu Sila faato‘ā agavaa loa lea mo le penisione.
O le toatele o nisi tagata matutua, ua maua le sitiseni Niu Sila, ona amata loa lea ona malaga i Samoa ma Ausetalia e asiasi i fanau. Ona oo lea ua atoa le 65 tausaga o le matua, e o atu e fai le talosaga mo le penisione ae teena e le Malo ona e maua mai le lipoti a le Ofisa o Femalagaaiga o le tele o taimi o loo fealuai i le va o Samoa ma Ausetalia, ae itiiti taimi o loo nofomau ai i se nofoaga e tasi i Niu Sila lava ia. I le vaaiga faaletulafono talu ai o loo fealuai e lē o nofomau i se nofoaga tumau i Niu Sila lava, ua manatu ai loa le matagaluega e lē tatau ona e maua le penisione.
O loo iai foi nisi o loo nonofo ma galulue i Atunuu i fafo o Niu Sila ona faato‘ā toe taliu mai lea i Niu Sila i le taimi ua atoa ai le 65 tausaga o le matutua. Peitai ane e talosaga atu mo le penisione ae teena e le matagaluega talu ai e lē o faamalieina le tulafono e tatau ona atoa le 5 tausaga o e nofomau i Niu Sila mai le taimi na atoa ai le 50 tausaga o lou matua.
Pau lava tagata faigaluega o loo agavaa mo le penisione a Niu Sila i le atoaga o le 65 tausaga le matutua, e ui e tele tausaga o faigaluega i atunuu oi fafo, na o latou o loo faigaluega i se matagaluega a le Malo a Niu Sila i atunuu i fafo.
Ae afai sa e faigaluega mo se pisinisi poo se kamupani tuma‘oti, poo se ekalesia foi i atunuu i fafo, e te lē agavaa lava mo le penisione a Niu Sila se‘i vaganā ua e faamalieina le tulafono o le atoa o le 5 tausaga o e nofomau i Niu Sila i le taimi e faaofi ai lau talosaga mo le penisione.
Ona o ia mafuaaga, ou te valuvalusia ai aa o le fau ina ia tautuana ma le tatou Atunuu, e lelei lava ona saili le tofa mamao, ma fuafua lelei tapenaga mo le lumanai, aemaise le saili o le tofa mamao mo taimi e faamalolo litaea ai mai galuega.
O le tāua foi o le saili o le tofa mamao e faatatau i taimi e malolo litaea ai tagata matutua, ona e matuā faigata lava ona maua se fesoasoani mai le Malo pe afai e faato‘ā tapa lava i le faamalamalamaga o se mataupu i le taimi mulimuli.
O le isi vaega tāua, e lelei lava le onosai ina ia faamalieina vaega uma o le tulafono faato‘ā amata ai loa ona malaga e asiasi i aiga ma fanau o loo i Atunuu mamao.
Afai foi ua iai fesootaiga ma le matagaluega a le Malo, e lelei lava ona faapepa uma fesootaiga ma le Matagaluega. Ia aua, aua lava ne‘i ave lou faamoemoe i se tuutuuga tuugutu ma se sui o le Matagaluega a le Malo. E lelei lava ona talosagaina e faapepa mai ni tuutuuga o se maliliega ua outou faia.
E tele taimi e fesuiai ai le finagalo a le Matagaluega a le Malo, tele foi fesuiaiga o faiga faaavae a le Malo, o loo aafia ai o tatou tagata, ae a ou tapa atu i se pine o feagaiga ma tuutuuga ae aumai le tali e leai se tusi na o talanoaga na faia i luga o le telefoni, poo se feiloaiga.
E lē taulia ni maliliega i luga o le telefoni poo ni tuutuuga tuusa‘o. E manaomia lava ni pine tusitusia e faasa‘o ai ni faafitauli i taimi e tulai mai ai ni feeseeseaiga ma le Matagaluega a le Malo.
O le mataupu foi lenei o loo finauai i talanoaga ma le Malo. O loo iai nisi faipule e talitonu ua tatau ona sii i luga tausaga e amata ai ona agavaa le tagata matua mo le penisione. Fai mai latou e tatau ona sii mai le 65 tausaga le matua o loo maua ai nei le penisione a Niu Sila, seia oo i luga.
Ou te talitonu lava a‘u ia e lē lelei lea fuafuaga. E lelei lava i papalagi auā o le toatele o papalagi ua ausia le 80,90 ma le 100 tausaga le matutua. A o tagata Pasefika ma Maori, e laki lava latou ua ausia le 75 tausaga ma le 80 tausaga le matutua, a o le toatele lava e lē ausia ia tausaga. Tasi lenei mataupu e ao lava ona tatou mataala i ai.
