O se taumafataga o le afiafi na totogi ai seleni a le au valaaulia e auai atu i ai, o se tasi lea o taumafaiga ua faaaogā e le faalapotopotoga tumaoti o le Mapusaga o Aiga ina ia saili ai se fesoasoani agai i galuega faalauiloa e faaitiitia ai le numera o ulugalii laiti ua aafia ona o sauāga i totonu lava o aiga.
O se mataupu maaleale lenei ma e tele ina tuu atu i faalapotopotoga fesoasoani nei i Samoa aemaise o Leoleo, latou te faatautaia galuega, e laveai ai le tele o ulugalii ua aafia ona o ia sauāga.
Peitai o le faaaopoopo pea o le numera o i latou ua lipotia le mafatia ona o ia sauāga, ua toe tulai mai ai nei le Mapusaga o Aiga e unai lea fesoasoani.
O le lua masina talu ai na sosoo ai lava faalavelave lea na faaoolima ai ni tamā laiti i o la taitoalua.
O se faalavelave lea na tulai mai i le faleoloa o RMJ McKenzies i Lotopa, sa fana ai e se alii lona toalua, ua palasi le tamaitai ma manatu ai le alii ua maliu lona toalua. Na iu ai lava ina toe faasaga ane lenei alii ma faaoo le oti ia te ia lava ma na faaaogāina ai se laau malosi e lē faatagaina i totonu o Samoa.
O le isi lua vaiaso mulimuli ane ae osofai e se isi alii e 40 tausaga le matua o Lepea ma Tulaele lona ia toalua.
O le faamatalaga na sau le tamaitai lea mai i lo latou aiga ina ua fesootai atu le alii lenei (o lona toalua ae e lē o toe mafuta), e alu atu e aumai se tupe mo sauniga a le la fanau o le Lotu a Tamaiti.
O tuliga i le auala tele lea na iu ai lava ina tu si tina ae osofai loa i se agaese. Ua faalua ona tulai le alii lenei i tuuaiga o le fasioti tagata faamoemoeina ma o loo faaauau ona tolopo lana mataupu se‘i faamautu ai se loia ma tali atu loa i le moliaga faasaga ia te ia.
E matautia ia faalavelave e lua ae o loo manatu foi Leoleo, ua matuā faaaopoopo foi le numera o tina ma fanau ua sauāina e tamā ma ua oo atu tagi i le vaega o loo nafa ma sauāga i totonu o aiga a le Matagaluega o Leoleo ma Falepuipui.
O le isi faalavelave i Vaigaga lea na maua ai le tino maliu o se alii e 40 tausaga foi le matua ua fasi e nisi i le vaveao o se Aso Sa o Setema, na maua ai foi o lenei alii e toafa le fanau, o lona toalua o loo taofia i le Toese i Tafaigata i solitulafono o le tagovale.
O le feagai ai o lenei alii ma le tausiga toatasi o le fanau na mātau uma lava e le afioaga aemaise o le aiga o lenei alii, le tele o le mafatiaga na iai lenei tamā talavou.
Ina ua maliu lea alii ma faasolo mai ai lava le numera o ulugalii laiti ua aafia i le tulafono aemaise o vevesi nei, na fesiligia ai loa poo iai ni faalapotopotoga o latou feagai ma le auaunaga e fesoasoani ai e lē gata i le mau ulugalii laiti i Samoa o loo feagai ma faigata, ae o fanau a i latou ua maliliu ona o sauāga ogaoga e pei ona ta‘ua.
Mo le Mapusaga o Aiga, o loo tatala le ofisa i le 24 itula e tali atu ai i soo se tasi e oo atu e saili fesoasoani mai i le faalapotopotoga, lea e ofo atu faatalatalanoaga faufautua, o fale e faamautu ai aiga, aemaise o fesoasoani e ave ai nei mataupu i luma o le Faamasinoga.
O lea la ua unai nei sailiga seleni a le MOA ona o le manao e agai i afioaga isi polokalame fesoasoani, ma ua aofia ai a‘oa‘oga e fia faia ma ulugalii laiti i totonu o nuu taitasi.
O nei sailiga tupe o le a faatino ai femalagaaiga mo sui o le MOA, ma ua iai le faamoemoe e taualuga ia sailiga fesoasoani i se tauvaga i le faaiuga o le masina lenei o Novema, o tauvaga a ulugalii e pei o ni tausala ma manaia.
O le Peresitene o le MOA o le susuga Pepe Seiuli, o le Sui Peresetene o Letiu Tamatoa ae o le Ofisa Sili o Salanieta Uili, o i latou nei o loo taitaia lava taumafaiga e saili mai se fesoasoani i le atunuu auā le faatinoga o nei polokalame.
