Saili le maopoopoga o le HRPP

E tele luitau ua feagai ma le vaega faaupufai a le HRPP ua fesiligia ai lona maopoopoga talu mai le tausaga e 1982 na tumalo ai i le faafoega o le Sa o le atunuu i ona upufai.
E molimauina pea lea tulaga i nisi o ana faiga faavae sa tulai mai ai faitioga malolosi faasaga i ana pulega malo.
Na faailoa e le alii Palemia o le taitai o le HRPP le susuga Tuilaepa, nisi o ia fuafuaga e pei o le lafoga o le VAGST, ma le suiga o le itu auala o se tasi o faiga faavae e ui sa lagolagoina e le toatele o faipule o le faafaletui, ae sa iai sui e lei lagolagoina.
I le saunoaga a le taitai na ia faaalia ai, o luitau ia sa avea ma avanoa e tofotofoina ai le ola faatuatua ma le ola tauivi o le faigamalo mo le faia o mea silisili aua le manuia o tagata uma o le atunuu.
Na ia toe faamamafa ai le manulauti a le vaega faaupufai talu mai taimi o le taitaiga a le afioga i le Tootooalii Tofilau Luamanuvae Eti Alesana, na faatau ai o le mea e lelei i Apia e lelei foi mo vaega uma o le atunuu.
E silia i le lua selau ma ona tupu sui lagolago o le HRPP mai vaega eseese o le atunuu na auai i le fono faaletausaga lea na faia ai filifiliga mo sui o lana komiti e nafa ma le iloiloina o ana sui tauva i faigapalota a le atunuu.
E toalua sui o loo tumau pea ae e toatasi le sui fou ma ua faamaonia lo latou filifilia.
O le aotelega o le saunoga a le taitai o lea vaega faaupufai na manino mai ai o loo tauivi pea mo nisi o galuega tetele aemaise o le faigapalota o le 2011.
Ua faailoa mai ai foi e le alii Palemia ma se polokalame o le suiga o le itu auala lea ua faatulaga ai se saunia lotu o le a faatinoina e le fono a ekalesia soofaatasi i le vaveao o le Aso Gafua, 7 o Setema o le a taitaia e le taitaifono o le fono a ekalesia, le susuga i le toeaina ia Oka Fauolo.
O lea sauniga lotu o le a faasalalau sao e fale faasalalau, ae o le ta tonu o le 6 i le taeao o le a tata ai logo o falesa uma i le atunuu ma feei pu o taavale e avea ma faailo e logo ai tagata uma ua amata le suiga fou o feoaiga i luga o alatetele.
Ua talosagaina foi e le taitai o le Malo le nofo a ekalesia Kerisiano i soo se fata faitaulaga i le atunuu ina ia avea le Aso Sa a sau nei ma aso e talosia ai ia latou sauniga o le taeao ma le afiafi le puipuiga saogalemu o le atunuu a o lumanai le aso 7 o Setema.
Ua maua e talafou a le Talofa FM molimau faamaonia ua faaalia ai e toatele tusitala o fale televise, leitio ma nusipepa i atunuu i fafo o loo foufou e malaga mai mo le lipotia o tulaga uma o le a faatino ai le suiga o le itu auala i Samoa.
Ua faailoa foi e le alii Palemia e faapea e toatele tusitala mai atunuu i fafo o le a latou lipotia taualumaga uma o le suiga o le itu auala. E le o suia le mau a le taitai o le HRPP, o le suiga fou o le a manuia uma ai tagata o le atunuu.