O nisi o auaunaga tāua tele i le atina‘e o tagata tafafao mai i Samoa, o faleaiga ma faletalimalo i le itu o meainu. E iai lava tagata e tafafao mai e sailiili poo ā ni vaega e patino tonu i lea atunuu ma lea atunuu e ese mai ai i isi atunuu e asiasi ai.
O le mafuaaga lea o se tasi o tauvaga o le Teuila o lenei tausaga, ua saili ai poo ai e mafai ona gaosia ni meainu mo le taumafa a tagata asiasi mai. Ua manino taumafa e patino lava i Samoa, ae o vaiinu e lē o tele se vaega faapea o le auaunaga i tagata tafafao mai.
O le agaga lava o sui tauva e toatolu na auai mo lea faamoemoe, o le faalauiloa ai foi o meainu (cocktail) latou te gaosia mai alaga‘oa o loo maua i laufanua o Samoa aemaise ai foi o le ituaiga meainu e faigofie ona gaosia, faigofie ona maua mea manaomia ma le tau o loo faaalu i mea e gaosia ai ma le tau e faatau ai.
O i latou e toatolu na tauva ma mafai ona auai, o le sui o le Faletalimalo o le Orator o Yvonne Papalii mai Faleula, o le sui o le TP’s Sport Bar o Cathy Tuna Tusiata mai Palisi, ma le alii o Montini Polu mai Lotoso‘a Saleimoa o le sui a le Faletaavale o le AA Car Rental i Lepea, ae o loo ofo lana auaunaga mo Faletalimalo e manaomia lana fesoasoani.
I se faatalatalanoaga ma sui e toatolu, na o latou ta‘ua ai e ui o le tauvaga o le Teuila ae o le agaga lava ia o le faalauiloa o lea auaunaga o loo maua i soo se Faletalimalo ma pa pia mo le silafia a turisi ma malo asiasi mai i le atunuu i meainu e maua i Samoa i soo se vaitau o le tausaga e asiasi mai ai.
O meainu a sui e toatolu sa faaaogāina ai e i latou uma nisi o fualaau ‘aina e pei o le mago, esi, fala ma le fa‘i. O le faatinoga o le meainu (cocktail) na saunia e Montini Polu, na ia faaaogāina ai le sua o le niu, o le vai nonu, honey, kulimi o loo gaosia mai le niu, kulimi gaosia mai le fala, faatasi ai ma sina vaega o le fagumalosi o le vodka.
Mo le silafia e le atunuu, o Montini o loo faigaluega i le vaega o le ‘au maketi i le Faletaavale o le AA Car Rental ae o lana auaunaga e mo soo se tasi aemaise faletalimalo e manaomia lana fesoasoani i lea auaunaga.
O le gaosiga foi o le meainu a Montini e faaaogā ai lava le atigi niu e faafefiloi ai ana alaga‘oa ma sauni loa mo le taumafaina. Ta‘ua e Montini, o lona faaaogāina o le vai nonu, e aogā lea mo le soifua maloloina o soo se tagata e inu i lana meainu.
Na ia ta‘ua foi e mafai ona inu mafanafana e mafai foi ona tuu i ai le aisa ma e iai foi le suiga pe a tuu i ai le aisa ma na fesiligia e se tasi o faamasino lea tulaga ae na tali Montini, e fua le tuu i ai o le aisa ma le leai o se aisa e fetaui ai ma le tau vevela o Samoa.
O le igoa la o le cocktail a le alii o Montini o le “lalelei o Samoa” ma na ia faaalia e mafai lava ona saunia e soo se tasi lea meainu auā e maua gofie mea manaomia. O se faamatalaga a le tamaitai o Yvonne, o le gaosiga o lana ituaiga meainu, e faaaogā i ai le mafaufau i mea manaomia e tuufaatasi mo se tofo lelei mo i latou e taumafaina.
“Ua ou faaigoaina la‘u meainu, o le Sunset Tropix ma a fia tofo i ai ona susū mai lea i le Faletalimalo a le Orator,” o se faamatalaga lea a Yvonne.
O le tamaitai foi ia Cathy, o se tagata e fiafia e galue i totonu o le Faalapotopotoga o tagata tafafao maimoa mai fafo, ma o le ala lea o le fiafia i le faatinoga o lea auaunaga ona e aogā tele mo turisi e malaga mai i Samoa.
O Cathy sa aoga i le Mataupu mo Tagata tafafao maimoa mai fafo ma taligamalo i le Iunivesite Aoao o Samoa, ma o lona faanaunautaiga lea o le galue ai i soo se galuega mo turisi i totonu o le atunuu.
Na molimauina e malo tafafao maimoa mai fafo lea tauvaga o le faalauiloaina atu foi o auaunaga o loo faatino i nofoaga poo Faletalimalo ma Pa o loo i totonu o le atunuu.
