O le susuga i le Failautusi Aoao o le Ekalesia Faapotopotoga Kerisiano Samoa, susuga Vavatau Taufao ma nisi o fanau aoga a le EFKS mai Salafai sa auai i le sailiga o ni fanau e fia ulufale i le fitafita o le laueleele a le Malo o Amerika

O le susuga i le Failautusi Aoao o le Ekalesia Faapotopotoga Kerisiano Samoa, susuga Vavatau Taufao ma nisi o fanau aoga a le EFKS mai Salafai sa auai i le sailiga o ni fanau e fia ulufale i le fitafita o le laueleele a le Malo o Amerika

O mātua o tagatānuu o Samoa Tutoatasi ae sa fananau nisi oo la alo i Amerika Samoa e faigofie ona maua avanoa e ulufale ai i le suega e saili ai ni tama ma teine talavou e fia ulufale i le fitafita a le Malo tele o Amerika. E faapena mātua o se isi o laua o se tagatanuu o Amerika e faigofie tele ona maua le avanoa oo la alo i lea tautua. Peitai o mātua ma fanau o tagatanuu moni o Samoa tutoatasi e le faigofie.

E ui ina iai le pa maa maualuga ma malosi o loo tuaoi ai aiaiga o tulafono tau femalagaiga a le Malo o Amerika e faigata ai ona maua e tagata e leo ni tagatanuu Amerika lea avanoa ae ua faailoa e sui o le fitafita faaleoleo poo le army reserve mai Amerika Samoa e iai feuiuiaiga e tatau ona faatino ona faatoa maua lea o le tali i le talia ma le teena o fanau a Samoa tutoatasi e fia ulufale i le fitafita a le Malo tele o Amerika.

O le susuga Robert Tamasese o se tagatanuu o Samoa tutoatasi ae o se tasi ua litaea mai le tautua i le fitafita a le atunuu. “Ua leva ona ou vaai i le toatele o fanau a Samoa e iu aoga ae le maua ni galuega ae o le avanoa lea ua taumafai iai e maua ai so latou lumanai”. O Robert sa feutagai ma le vaega o le fitafita faaleoleo o le laueleele i Amerika Samoa ma tatala ai le faitotoa e malaga i Samoa ni sui o le fitafita faaleoleo e faafeiloai fanau i le Kolisi maualuga a le ekalesia a Iesu Keriso o le Au Paia o Aso e Gata ai e faatalatalanoa ai lea avanoa. Sa feiloai foi le au malaga ma fanau o loo aooga i le Kolisi o Malua Fou ma le Aoga o Matata eseese a le EFKS i Tuasivi i Savaii. O le feiloaiga na faia i le maota o Tupulaga EFKS i Mulinuu sa fofola ai e sui o le fitafita faaleoleo mai Amerika Samoa aiaiga e mafai ai ona ulufale se tasi i lea tautua pe a pasi le suega ulufale.

Peitai sa tuu fesili nisi o faafeagaiga sa auai pe o le a le tulaga mautinoa o lea avanoa pe a fua i le fefeu o aiaiga o tulafono tau femalagiga a Amerika mo tagata e matuā leai se piitaga e mafai ai ona agavaa e maua se galuega pe nofo mau foi i lea atunuu malosi lona tamaoaiga.

O le tali a sui o le aumalaga e pau lava le itu tāua ia i latou ia pasi le suega ona taatia atu lea o le a feutagai ma le sui faipule o Amerika Samoa i Uosigitone le faletua o Aumua Amata mo le faia o pepa e mafai ai ona talia ma ulufale i le fitafita a Amerika.

Na molimauina le naunau ane o fanau e fia iloa atili faamatalaga mo le fia maua o lea avanoa aemaise o le auai o le failautusi aoao o le ekalesia Faapotopotoga Kerisiano Samoa le susuga Vavatau Taufao.

Na faaalia e le failautusi sa talosaga i le savali pe maua se avanoa mo fanau o loo aoaoina i kolisi a le ekalesia o le mafuaaga lea o le feiloaiga i le Aso Faraile ua mavae. Ua talosia e le toatele ia maua nisi ae o le tala a sui o le savali a fai le suega ae maua se au pasi se 20 pe 30 e lē nofonofo i le finauina o se faiga lelei e agavaa ai ona ulufale ni tama ma ni teine talavou mai Samoa Tutoatasi i le fitafita a le Malo tele o Amerika.