Ua finauina e le Ao o le Malo le afioga i le tama-aiga Tui Atua Tupua Tamasese Efi le sailia o le mea moni e ala i le mulimulitai i taiala o pulega lelei ina ia maua ai le fofō o le feteenaiga ma lona nuu o Lufilufi, lea ua latou faateaina o ia ona o le galuega o le fale o lona aiga ua faia i luga o eleele e faasino i le pule faasa‘o a le Tui Atua i Mulinuu ma Sepolata‘emo.
O le feiloaiga na faia i luma o le lesitala o faamasinoga o fanua ma suafa i le Aso Gafua, 23 Aukuso 2010, na folasia ai se finagalo tusitusia o le tama-aiga.
Le folasaga a Tui Atua:
“Ona e fai si lavelave o mataupu ia o le a asiasi i ai la‘u faamatalaga, o lea e faamalulu atu, o le a faitauina le lomiga auā faamaumauga a le Ofisa.
Ua tuanai le Aso Sa. Ma e le taumate iā tatou taulaga ma a tatou tatalo sa tatou tausili i le Atua i lana faasinoala. Ma o lea o le a ou tautala atu i le tali i a‘u Talosaga.
Ae ou te lē faia lea faamatalaga i se agaga faumalo auā o tatou uma tatou te tofu saili i le alofa ma le amiotonu o le Atua.
E lē faigofie ona faatalatalanoa i le faafitauli ua tulai mai auā ua matamataita tagata.
Ma ina ia maua le mafaufauga lelei, e ao ona taumafai e ‘alo‘aloese ma le ita ma le upu faatiga, pe afai tatou te naunau ia maua le mafaufauga lelei, le mafaufauga e ulufia i le alofa ma le amiotonu o le Atua.
E talitonu e fesoasoani i le tatou tofa saili pe afai tatou te amata mai i le ‘auga ma le autū o le faafitauli.
O le ‘auga ma le autū, e tetee le finagalo o le nuu o Lufilufi i Iuga o le Faamasinoga 1987, 2003, 2010
Se‘i fai sa‘u tala i Faaiuga o Faamasinoga. E lē mafai ona tāvavae le Tui Atua ma le Ao o le Malo auā o le Tui Atua o le Ao o le Malo. E mafua ona Ao o le Malo ona o le matai.
E lē tu le Ao o le Malo i luga o se uaniu, e tu i luga o le matai. E mafua ona Ao o le Malo ona o le talitonuga o ia o se matai lelei.
Ona o le talitonuga o ia o se matai fainuu lelei. Afai ua faamaonia e lē se matai lelei ma e lē se matai fainuu lelei, o lona uiga ua āfaina le talitonuga lea e mafua ai ona avea ma Ao o le Malo.
O le talitonuga lenei e mafua ai le ‘auga ma le Faavae o le Tulafono a Samoa.
O se tasi o molimau o le ‘auga, o le tapu o loo fai nei ma maa faavae o le Tulafono, e lē mafai ona molia le Ao o le Malo i le faamasinoga.
E mafua lena ‘auga ma le maa faavae, ona o le talitonuga, o le Ao o le Malo o se tagata lelei, o se matai lelei ma se matai fainuu lelei. Afai e faamaonia e lē o se tagata lelei, e lē o se matai lelei, e lē o se matai fainuu lelei, ua āfaina le talitonuga o le maa faavae ma le autū o le tapu lea e faavae ai le Tulafono a Samoa e lē mafai ona molia e se tasi poo nisi, le Ao o le Malo i le Faamasinoga. Ma ua ao loa ona faamavae mai le tofi ia lē o loo umia le Ao o le Malo.
E lē mafai ona tuumavaevae le Tui Atua ma le Ao o le Malo
Auā o le Tui Atua lea e umia le Ao o le Malo. Ma afai ua āfaina ia maa faavae o le tulaga o le Ao o le Malo ona o se mea ua faia po ua lē faia e le Tui Atua o loo umia le tofi, e ao loa ona faamavae.
Liliu mai i le galuega a le Ofisa o Faamasinoga, ma le galuega a alii Faamasino. E iai ma le isi itu ma‘ale‘ale.
O alii Faamasino, e faamaonia o latou tofi e le Ao o le Malo mai luga o le fautuaga a le Komisi o Faamasinoga ma le Kapeneta.
O le Iuga lea e faatūtū nei i ai le tetee a le nuu o Lufilufi, o Iuga na faia e alii Faamasino, o lona uiga ua siligia e lē gata i le amiotonu a lē ua avea ma Ao o le Malo, a ua siligia foi le agavaa ma le faamaoni o alii Faamasino, aemaise ua lē uia le ala o mea, o le faaulu o se Talosaga.
O le faiga faavae , a iai se isi e fia faalavelave i se galuega e faia i luga o se eleele tau i le aganuu, e aga‘i mai i le Ofisa i Mulinuu ona avatu ai lea o le tusi taofi. Ua lē uia lea auala ma e talitonu e mafua ona e iloa lelei ua mae‘a le Iuga a le Faamasinoga i le pule o le eleele.
O lona uiga, ua faamoemoe e soloia le Iuga o le Faamasinoga e le malosi o le nuu
A tuu foi i le tofa alualu mamao, e lē toe malu se Ao o le Malo. Afai e avanoa ia tagata e faatulai mai le mau o lē umia le Ao o le Malo e lē se tagata lelei, e lē se matai lelei, e lē se matai fainuu lelei, e aunoa ma se faavae, pe faamavae pe lē faamavae le Ao o le Malo, ae ua iloga ona āfaina le mana ma le tulaga e apoapoina le talitonuga lea e faavae ai le Tulafono a Samoa.
Afai foi o le agaga o le nuu o le tetee i le Faaiuga a le Faamasinoga, e ao ona silafia, e lē tasi se vaega o le Iuga o le Faamasinoga.
E iai Iuga e faasino i le pule o le maota ma le tuamaota o Mulinuu & Sepolata‘emo; e iai Iuga e faasino i le vafeagai ai o le Tui Atua ma lona auaiga; e iai Iuga e faasino i le Tui Atua ma le faafeagai ai ma Lufilufi; e iai le Iuga e faasino i le faamaoniga o le nofo i le Seutatia. Afai e lē malu se fofō o le mataupu i le taimi lenei, e toe tulai mai ma tulai mai.
Auā a liliu atu e faataunuu aiā tatau e tusa ai ma Iuga a le Faamasinoga i le lumanai, ae faauilavea le nuu ma fai mai ua tea po ua soloia le Tui Atua ma anitema ona suli, e lē malu le Tui Atua poo a‘u poo se isi, ma e lē malu foi le Ao o le Malo poo a‘u poo se isi.
A fua i le matamataita ma le ‘iga‘igā, e faigata ona maua se faatalatalanoaga e toafimālie ai. Ae ona e telē ma loloto ma anoanoai mea e aafia ai i le mataupu, o lea e sili ona lafo i se Komisi Suesue e suesueina ai i le agaga toafilemu ia mataupu nei:
• Pe faamaonia pe leai ia tuuaiga a Luilufi e faasaga i le Tui Atua?
• Lipoti ma fai mai ni fautuaga i le Palemia ma le Kapeneta.
O le matafaioi e faatūina ai se Komisi Suesue e fitoi tonu i le Palemia ma le Kapeneta. O le mataupu i le Komisi Suesue, ua mae‘a ona laolao i le va o le alii Palemia ma a‘u nei.
E lē mafua ona ou lagolagoina se Komisi Suesue ona o le ita poo le naunau tā. E mafua, ona ou te talitonu, o le avanoa talafeagai lea e saili ma faamautuina ai le mea moni.
O le mea moni, o le faasinoala lea i le amiotonu a le Atua. O le amiotonu a le Atua, tatou te maua ai le toafilemu”.
