Saili finagalo o tagata i le faaauau ona faalautetele auala o le malo

Ua lē o toe fesiligia le siitia o le tamaoaiga o Samoa ma ua faapena foi ona siitia ai ma le tele o suiga i le soifuaga o aso uma ma ua televave ma saoasaoa ai ma le lamatia o le soifua o tagata i faama‘i eseese, o le mau soligatulafono fou, atoa ai ma le siitia vave o le tamaoaiga o tagata.
E pine faamau lea tulaga i suiga e tele ua iai Samoa i nei aso e pei ona molimauina i pisinisi eseese ua faatutūina i le atunuu, o fale tetele ua fausia i le taulaga, o sikaili a tagata ua saoasaoa suiga ma ua suisui mālie ai foi ma le faatinoga o a tatou tu ma aga i fanua e ui o loo mau pea le toovae i taitai o le malo ma le atunuu, ina ia faia auala e puepue mai ai a tatou tu ma aganuu aemaise o le tatou gagana.
O suiga nei ua vaaia foi i le agai pea o fuafuaga a le Malo e fausia nisi o atinae e pei o ala tetele ia talafeagai ma le manaoga o tagata ma pisinisi ma televave ma faigofie ai feoaiga. Ua tele taavale i Samloa talu ona suia le itu o le auala e feoai ai.
O popolega foi ia ua vaaia ona o le faatupulaia o le numela o taavale, ua vaapiapi ai ma auala tetele ma ua tuai ai ma feoaiga i galuega, o aoaoga ma pisinisi masani o aso uma.
Ua silasila lo tatou atunuu o loo fai ma malaga i Samoa i suiga ua iai nisi o vaega o auala i le taulaga, lea ua ta‘i lua ai taavale ua malaga i se itu auala e tasi. O se vaaiga sa lē masani ai i le tele o tausaga ua mavae auā sa na o le taitasi lava taavale i le itu i le alu ma le sau.
O na tausaga ua alu sa lei toatele nisi e gafatia le tau o ia oloa taugata auā sa na o tagata lava e lelei tamaoaiga sa gafatia faapea le aufaipisinisi malolosi.
O aso nei e pei ona molimauina ua salalau i atunuu i fafo o tatou tagata ma ua maua ai le isi laasaga lelei i tupe maua ma ua sasaa atu i aiga i Samoa ma fausia ai fale lelei, faatau ai fanua ma faatutū ai foi ma pisinisi.
O ia suiga lelei ua molimauina foi i le gafatia e tagata o auala ua faataatitia e le Malo mo le faatauina o ni taavale e ala i ni nonogatupe ma ua vave ai ona faaopoopo pea ma faatupulaia le numela o taavale feoai.
O le vaiaso lenei ua amata ai ni faatalatalanoaga a le Pulega o felauaiga i luga o le laueleele ma le mamalu o le atunuu o loo alala amata atu i Vailoa Faleata e oo i le pitonuu o Saina (Toamua), i le faamoemoe e sailia ni finagalo o lea vaega o le atunuu i se fuafuaga ua toe faataoto nei o le sosooina o le faalautele o le auala mai Apia agai i le itu i Sisifo lea e lei leva ona mae‘a ona faalautele le sau mai le alasima i Lepea agai i se vaega o Vailoa ua matagofie ai ma vave malaga a taavale ona ua ta‘i lua taavale i le itu poo le lane.
Ua faaalia e se ofisa sinia o le pulega o felauaiga i luga o le laueleele, a oo nei ina faatino lea galuega, o le a sili loa ona televave feoaiga mai Apia agai i Vaitele le nofoaga o loo iai le tele o pisinisi ma kamupani.
O le taimi nei o loo vaaia pea le poloka o le alatele mai lea faaitu ona e vaapiapi tele le auala i Vaitele ma e etele ina poloka ma tuai ai tagata faigaluega ma fanau aoga aemaise o le atunuu lautele feafioai i fuafuaga masani o aso taitasi. E iai le talitonuga o fuafuaga nei a le Malo e faaauau pea ona faatino seia oo ina paia le malaevaalele faavaomalo i Faleolo ma le uafu i Mulifanua.