“E manaomia tagata e tutumau i taiala e lē fefefe foi”
Ua liliu le asosi o alii ma tamaitai tusitala i Samoa ma le faauluuluga o aoaoga faatusitala i le Iunivesite Aoao o Samoa e faalautele atu i le fanau i Kolisi ma Aoga Maualuluga ile atunuu, i latou ua lata ina mae‘a le vasega ono maualuga, pe fia avea ma tagata faasalalau ma tusitala pe a faaiuina le taumafai. O se tasi lea o tomai faapitoa o loo fia maua nisi se toatele i alo ma fanau a Samoa e galulue ma tautua ai.
O tausaga ua mavae a o lei faaofiina e le Malo i le aoga o matata eseese faapitoa le Polytechnic le mataupu tau i galuega faatusitala, sa saili le totele o tagata e galulue i lea tomai faapitoa ia i latou e tau iai ni poto masani ile galuega, poo le leai foi.
O nisi sa aooga ai i atunuu i fafo sa vave apo e leitio ma nusipepa ona o le manaomia olo latou poto aoaoina, ae peitai e alualu lava tuua ei latou le galuega ona o nisi fuafuaga, ae toe tau saili nisi e faaauauina.
Ina ua faavae le mataupu o le tomai faatusitala le journalist i le aoga o matata eseese sa amata le aoaoga ia i latou o loo galulue i leitio ma nusipepa, faapea le televise e tasi na muamua faavaeina a o pulea e le Malo i lea vaitau.
Peitai e lei faamalieina ai manaoga o nei auaunaga ona o nisi o le fanau na mulimuli ane ulufale i le aoga e aoaoina lea tomai, o nisi na mafua ona ave le faatusitala ona ua leai lava se isi mataupu e mafai ona agavaa ai poo ua lē maua foi se avanoa i isi mataupu.
Na alu a‘i pea le aoaoga seia oo ina see atu le aoga o matatata eseese ma ofi i le Iunivesite aoao lea lava la ua faaauau ai. Peitai e lē o iloga ona faamalieina ai le auaunaga faasalalau ma galuega faatusitala ona o nisi fanau e iu, ua ese matata ua galulue ai ae ua lē o le galuega faasalalau ma tusitala. E oo mai lava i le taimi nei o loo faapena ona faafaigaluega alii ma tamaitai e lei aoaoina i le tomai ae faatoa maua le aoaoga i le taimi ua galue ai.
O le fia siitia pea la o lenei tautua i se isi laasaga sili ona maualuga atu, ma ia saili foi alii ma tamaitai o le faaiuina aoaoga e fia tautua ai, o le mafuaaga lea o se savali a tusitala sinia o le atunuu o le a afea ai Kolisi ma aoga maualuluga uma i le atunuu i le vaiaso nei, ma le vaiaso fou.
O Kolisi i Aleipata e amata ai lea a mae‘a ona faasolo atu lea i kolisi ma aoga maualuluga i isi itumalo seia oo ina fasopolia Upolu ona see atu lea i Savaii o le faamoemoe.
Faaalia e le Pelesetene o le asosi a tusitala o ia foi lea o le sui taitaifono o le laulau o loo nafa ma tapenaga o itu e faaleleia ma aoaoina ai lenei tomai faapitoa le susuga Uale Papalii, e manaomia nisi o loo iai le naunautaiga e galulue ai ma tutumau ma tausisia foi taiala o le galuega ae lē fefefe foi e fai le galuega.
O se galuega e lē faigofie auā e tele ona faafitauli ma luitau e pei ona saunoa le pelesetene i le faalauiloaina o le faamoemoe i le Iunivesite aoao a Samoa i le vaiaso ua mavae lea na faia ai ma le foai a le Bluesky e valu afe. O le kamupani telefoni foi lea ua na lagolagoina le faamoemoe atoa.
