Saili e leoleo le pagota fasioti tagata

O loo sailia nei e leoleo se alii pagota o loo tuli lona faasalaga soloatoa i le solitulafono o le fasioti tagata faamoemoeina, na sola ese ma le falepuipui i le masina na tea nei. O le alii pagota o Iosua Savusa mai Faleatiu sa faasalaina i le soloatoa i le falepuipui, faatasi ma isi taulelea e toatolu mai Faleatiu ina ua molia faatasi i le faaoo o le oti i se tasi o tama i se faalavelave na susunu ai ma le fale o se aiga i Satapuala i le tolu tausaga ua mavae.
Faaalia e leoleo ua fiu e alu sailiga i le aiga o le alii o Iosua e le maua i ai, pau le faamatalaga o loo latou maua o se vaega mamao i uta i le vaega o iai faatoaga a le nuu o loo lafilafi solo ai le alii pagota. Ae i se tala lata mai i suesuega a leoleo i le fasiotia o le alii ave taavale o Ofisa Itula, lea na maua lona tino maliu i tua o le keli o lana taxi, ua faailoa mai e le sui sooupu o le matagaluega le afioga i le komesina lagolago o Papalii Li‘o e iai faamatalaga ua faaoo atu e nisi o le atunuu ua tau maua ai se fesoasoani i suesuega o loo faia, peitai e lei taofia se isi, pe ua masalomia foi nisi i le faia o lea faalavelave.
O le tulai mai o lenei faalavelave o loo toatele ai pea tagata latou te fesiligia poo le a se malosi ma se maeaea o iai le malupuipuia o leoleoga a alii leoleo o loo galulue i le falepuipui i Tafaigata, ona o le tulai mai pea o nei tulaga o loo sosola soo ai tua pagota mai le toese. E pei ona silafia le faalavelave talu ai nei lea na le mafai ai e leoleo ona taofia le toa 41 o pagota na agai mai se latou teva i le taulaga i se fuafuaga e fia faaoo so latou faagaulemalie i le malo e tusa ma tulaga le lelei o loo iai le falepuipui i Tafaigata.
O le atugaluga o le toatele, ona e foliga o loo tele lava le saolotoga o pagota i mea e feoai ai, aemaise lava ia i latou o loo faasalaina i ni soligatulafono matuia e pei o le fasioti tagata, ma ua masani ai i lea ituaiga o solitulafono.