Saili Derek Ieru mo sona avanoa i le Maketi pese a le Lalolagi o pese palagi

A o agaigai i luma le maoa‘e o le tomai pese ua talenia ai le toatele o alo o Samoa i lenei foi vaitau o le soifuaga, ae ua matauina ai le tulaga matilatila mai o se tasi o alo o le atunuu i lana ia foi faatinoga o lenei lava taleni o le musika, le alii o Derek Ieru.
O Derek o se alo faasino i le pule o le kamupani Vision CD and Video World Ltd, le susuga Vili Ieru ma le faletua ia Luaipou Ieru. O Derek na muamua ona faafofoga i ai i le pese na ia usuina muamua ‘E mamafa lava si tama’ le pese foi lena sa matuā fiafia i ai tagata, o loo sau foi i le ata toe foi le tama Savaii.

 
Ae o lea ua sau i tua le isi ana CD fou Qsoul ‘Live my Life’ e lua ni pese Samoa o iai Lamepa Susulu na tusia e Reno Fenumiai o se uo a Vili Ieru, ma le pese Samoa Matalasi na tusia e Vili i le 1977 a o iai i le Tiamaa mai Toamua.
E 8 ni pese palagi na tusia lava e Derek ma nisi pese tuai palagi My girl ma le Love will keep us alive na toe usuina e Derek. O lenei CD o pesega faaonapo nei Reggae and Soul.
E tau ese mai le faatinoga o le taleni pese a le alii o Derek, ona o loo taulai le faamoemoe o lenei alo o Samoa i le mainstream poo le maketi pese a le lalolagi atoa o pese palagi.

 
Ua uma ona tuuina atu lenei CD i se tasi o kamupani o loo maketiina pese i le lalolagi, ma o se tala fiafia ua faamalieina le pule i pese na tusia lava e Derek latou te maketiina i le tulaga lea o le faatau o le pese i luga o le internet i le tulaga o le Digital Download.
Fai mai le alii pule lea o ituaiga Reggae nei a tagata o le Pasefika e matuā fiafia i ai tagata mai South America ma soo se vaega o le lalolagi aemaise o loo usu i le gagana  peretania. Sa faaauau te tala a lenei alii palagi afai ae maua se miliona o tagata e faatauina se pese se tasi i luga o le internet ua matuā lava lena.

 
O Derek o le ulumatua lea o le aiga ma e lauiloa i tagata papalagi auā o loo tele ina pese ia latou koneseti ae o le koniseti a le tamaitai, le Afioga Aumua To‘afā na faatoa pese ai i tagata Samoa.
E masani foi ona pese i faleaiga i Ponsonby ma le taulaga i Aukilani. Sa iai le faaili a tamaiti Samoa ma Tonga sa faaigoaina o le Spacific sa matuā lauiloa i le 6 tausaga talu ai ona o ni pese se lua na tusia e Derek ma latou pueina i se CD.
O le faaili lena sa taamilo i Peretania ma o ni uo uma a Derek sa latou aooga faatasi i Onehunga High School. O loo pueina uma lava e Derek faapea le taina atoa ma le usuina o loo faia uma lava e ia i se masini pue pese na faimeaalofa i ai lona tamā faatasi ai ma mea faifaaili o loo faaaogā i lana Recording Studio.

 
E faafetaia e le alii talavou o Derek le alofa o le Atua ia te ia ma lenei meaalofa ua foai mai e avea ma ana taleni. Ua faatauina nei i tua le CD i le 2”Mason Ave Otahuhu, Manea music i Mangere, Mac Music i Manurewa, Vision Music i Savalalo market, ma luga o le Internet Digital Download pe a uma ona sainia le feagaiga ma le kamupani pese a Niu Sila.
O le taimi nei o loo malaga le tuaa o Derek i Samoa mo le pueina o le Vaega 2 o le ata tifaga ‘Toe foi le Tama Savaii’, ae ua iai le faamoemoe pe a toe taliu mai, ona saini loa lea o pepa ma tuuina atu i le kamupani mo le faatauina i luga o le Internet.

 
E amata pue le Ata, Toe foi le Tama Savaii i lona Vaega 2 i le faaiuga o le vaiaso nei i Samoa, ma le faamoemoe e sau i tua ia Mati pe a ogatusa uma fuafuaga e pei ona faatulaga ai. E tolu vaega o lenei ata e pei ona ta‘ua i se faamatalaga mai le alii pule o le Vision CD and Video World Ltd, susuga Vili Leilua Ieru.

 Le alii pese o Derek Ieru ma lona tuaa, Susuga Vili Ieru