Fai mai o matafaga lauoneone ma le laufofoga fiafia oni vaega taua e tosina ai tagata tafafao o isi atunuu e malaga i Samoa e eva ma tafafao ai ma faaalu ai a latou tupe. Peitai ole fono tele a tagata oloo atinaeina le tulisi i Samoa na folasia ai nisi o vaega e sili atu ona taua ma lelei e fai ma faatosina o tagata mai fafo.
Ole afioga ile Palemia susuga Tuilaepa L Sailele Malielegaoi na tatalaina le fonotaga ma o lana fautuaga malosi ia silasila faletalimalo ma faleaiga e gaosi meaai Samoa auā e leai ma se isi o ia auaunaga o gaosia taumafa ale atunuu ae na faaalia ele Palemia ole mafuaaga lea e fia tafafao ai tulisi i isi atunuu ole fia tausasami i meaai a se atunuu e ese mai taumafa ua masani ai i latou.
“Na ou alu i Savaii o’u nofo ise tasi o faletalimalo, ma na ou fai ise tasi ole au faigaluega o a’u oute fia ‘ai ise panikeke Samoa, ae na fai mai e lē mafai. Na ou fai iai e alu e fai ile pule ole faletalimalo ole a ou alu atu e kuka la’u panikeke auā na’o le falaoamata e palu ile vai, ole mea lena na maua ai la’u panikeke”.
“E oo ise faalifu fa’i poo se talo, se i’a tunu e lē maua, aisea ua faapea ai tatou? Ole fono ale au fai faletalimalo o faleaiga ma isi auaunaga e fesootai ile atinae o tulisi na valaaulia ai nisi mai fafo e faia ni a latou folasaga faatatau i auala e mafai ai ona siitia le atina’e.
Ose tamaitai mai Peletania e galue ile vaega o maketi na ia tatala folasaga ole faatasiga. Ole faamatalaga ale tamaitai o Sarah Mathews ole Faatonu ole vaega o maketi ole TripAdvisor ole maketiina o tagata tulisi mai Europa ma Asia e matua eseese lava auala ma metotia e faaaogā.
O lana faamatalaga pe afai e maketi le atinae a se atunuu e pei o Samoa ae nao na faailoa ose atunuu e lauoneone matafaga e tutusa lelei lava ma matafaga lauoneone oloo maua i isi atunuu Asia, ma o lana faamatalaga e sili atu ona tetele ma matagofie matafaga lauoneone o atunuu Asia nai lo atunuu ole Pasefika e pei o Samoa. Ole auga o lana folasaga ia silasila i isi auaunaga tau tulisi e maketi ai se atunuu.
Ole tau o potu ma isi auaunaga e tatau foi ona silasila iai. Ole saunoaga ale Palemia na ia ave ai le tuualalo ia i latou o faia le atinae ina ia faataugofie potu auā ole isi lea pogai ole mumusu o tulisi e malaga i Samoa auā e taugofie ai potu o faletalimalo i atunuu Asia ia poo isi foi atunuu ole pasefika.
Ua iai le kamupani vaalele ale atunuu le Samoa Airways ua maua pasese taugofie ma ose tulaga lelei le taugofie o pasese a vaalele ae tuu ifo ai foi i lalo ma totogi o potu o faletalimalo.
Na fesili le Palemia pe aisea e ave ai ni aso livi o Pule Sili ma Pule Sili lagolago o Matagaluega ma Faalapotopotoga ale Malo i Niu Sila poo Ausetalia, ae lē faaalu a latou tupe e tafafao ma malolo ai i Savaii ma faaaogā faletalimalo oloo iai. Ole isi lea auala e fesoasoani ai tagata Samoa e atinae tagata tafafao ma faaleleia ai lea atinae ale atunuu ose tasi o ivitu ole tamaoaiga o Samoa.
