O tupulaga fai a‘e o le atunuu, e iai le talitonuga o le lumanai manuia lea o aiga, nuu, Ekalesia ma le Atunuu. O le ala tonu lea o le taumafaiga a le Sosaiete o le taaloga Netipolo a Samoa (Samoa Netball Association), ina ia unaia le faatinoina ma le a‘oa‘oina o le tomai o alo o le atunuu i le taaloga o le netipolo a o agai i luma le olaga.
Faaalia e le Failautusi o le Asosi Netipolo a Samoa, Sauia Lonise Matai‘a, “e tāua tele le amata atina‘e mai o le taleni a alo ma fanau a le atunuu a o laiti.
O le vaiaso nei la, sa amata ai lea taamilosaga mo tamaitai Tulagalua i le Itumalo a Faleata, ma o aoga sa mafai ona auai o aoga Tulagalua a Saina, Vaigaga, Vaimoso, Aleisa ma Vaiusu. Sa molimauina e mātua ma sui o ia aoga taaloga i le va o fanau teine a ia Aoga ma sa faia i le malae o le aoga Tulagalua a Vaigaga.
E 11 Itumalo o Upolu nei o loo faagasolo i ai lea taamilosaga ae valu Itumalo i Savaii o le a oo atu i ai le faasologa o lea Taamilosaga pe a mae‘a Upolu. Na taua foi e Sauia, e lē o se taimi muamua lea ua faia ai lea taamilosaga, sa fai muamua ma o le faanaunautaiga lava ia, ina ia lelei le amata atina‘e mai o le netipolo a o agai i luma le taleni a le fanau.
O le faanaunautaiga foi, ina ia maua le tomai i le faatinoina o le netipolo ma faasolo i aoga maualuluga le fanau, ma atonu o le a maua ai ni isi sui lelei mo le ‘au netipolo a le atunuu.
E lua vaega o loo vaevae i ai lea taamilosaga ma o le vaega mo teine laiti poo Junior Girls e mo i latou o loo i le vasega lima i le vasega ono ma le Vaega lua e mo tamaitai o loo i le vasega fitu ma le vasega valu. E ese foi le sagisagi mai o le fanau na vaaia le tausinio ai i le amataga o lenei taamilosaga ma ua tumutumu foi malae taalo o le neitpolo a o taumafai ai le Asosi e unai le tomai i tulafono ma le faaaogāina o togi ina ia mafai ai ona maua ‘ai o ‘au taitasi.
Faaalia le agaga faafetai o le Asosi Netipolo ona o le lagolago a faiaoga ma le fanau faapea mātua sa mafai ona auai e faamalosiau i fanau sa tausinio mai i Aoga taitasi. Faaalia foi e Sauia, o se taimi foi o i luma, o le a faia ai le Taamilosaga e tauva ai i vaega mai Itumalo taitasi ma o le a faaauau pea ia taamilosaga mo le atina‘ega o le netipolo mo aoga Tulagalua uma i totonu o le atunuu.
