O le osi aiga o le Samoa, e lē kea poo fea e tupu ai se faalavelave, e tulai lava ma savali. E leai a se fai loto i le pule faitoatasi a le Matai, e fa‘i le matua e fa‘i foi le moto. O se fuafuaga faaleaiga na mafua ai le malaga atu o le tamaitai o Ruby Fualau (30 tausaga le matua) e momoli nai ona mātua i le malaevaalele i le aso 22 o Fepuari ae tupu ai le faalavelave.
Na faamavae ma le manatu e toe feiloai, peitai, ua lē tau lau o faamoemoega. Talofa i nai ona mātua o Rosalia ma Fualau Filemoni Fualau. Ua matutua lo la soifua ina ua logo i se tala faamomoi loto ma toe taliu mai ai lava i Brisbane ma agaga ua nutimomoia. O le talavou ia Ruby Fualau mai Lotofaga sa avea o se manager i le McDonalds. Talofa o le lima taumatau o nai mātua auā o se tamaitai e tausaafia e tagata faapea lona tausi faamaoni i nai ona mātua ma le aiga. E misia e ana uo i le galuega, ekalesia aemaise nai ona mātua ma le aiga atoa. O le itula e 5 i le afiafi o le Aso Sa, aso 3 o Mati na faia ai ona sauniga faaleaiga i Marsden, sa taitaia e lana auauna le susuga ia Pr Samuelu Afamasaga o le ekalesia Aso Fitu o le toe afio mai i Cornubia. Tele faafeagaiga sa fai sao ma lagolagosua. Na faia ona toe sauniga i le taeao o le Aso Gafua ma molimoli atu ai i lona oliolisaga tumau i le fanua maliu i Beenleigh. Faamaise le Agaga o le Atua i le tamā ia Fualau Filemoni ma Rosalina ma le nofoaalo, le aiga atoa, ekalesia, ma uo uma a lenei talavou ua malolo ma faamuta ana galuega i le na o le 30 o ona tausaga.
