Sa lelei ona tapena e le ulugalii olaga o le la fanau

Na iu lava ina manuia uma aoga a tamaiti, ma e toatasi lava le tama na nofo i Samoa e faaauau ai ana aoga seia oo ina faigaluega, ae o le isi toatolu, na maua uma lava a latou sikolasipi e aooga ai teine e toalua i Niu Sila, ae o le isi tama na sikolasipi i Fiti.

O se olaga ese lea ua oo nei i ai Asora ma Meaalofa, aua ua tauia lo la tautiga ma le onosai, e le gata i le galulue e faatupe aoga a si a la fanau, ae o le tauivi malosi e onosaia faamatalaga ma uiga le alolofa o le aiga o le tamaloa.

Ae o lenei, ua na o le selesele o le ulugalii i faamanuiaga e tele. Na uma aoga a teine i Niu Sila ma nonofo ai lava ma faigaluega. Ua tele ina feoai le ulugalii o Asora ma Meaalofa i le va o Niu Sila ma Samoa, aua e le mapu teine i le faamautinoa e aumai o la matua e faatafafao mai mo ni masina ma toe foi i lo la aiga i Samoa.

Ae ese mai lenei tausiga lelei o loo faia e tamaiti i o latou matua, ae o se mea lenei e lei talitonu ai tagata o le nuu aemaise foi o le aiga lava latou, aua e lei faapito le alofa o tamaiti i na o o latou matua.

Sa galo nimo i tamaiti le agaleaga o le aiga o lo latou tama ia latou ma si o latou tina, ae ina ua maua tupe ma maua tulaga lelei i galuega, sa faatulaga uma e nei tamaiti le auala latou te saosaolaumea uma ai i le tausiga o isi tuafafine o lo latou tama ma o latou aiga. O le fanau lava foi lenei a si fafine o Meaalofa, na mafai ai ona iloa e tuafafine o lo latou tama foliga o Niu Sila ma Ausetalia.

E lei iu lelei uma fanau a nei tuafafine o Asora, ma e lei iai foi se isi na oo mai i Niu Sila i ni ana aoga poo ni galuega. Ae o le mautu o le fanau a Asora ma Meaalofa, na mafai ai ona auauai uma mai i Niu Sila o latou tei nei, ma o galuega lelei nei a le ulugalii i le la fanau, ma sa manatua uma e tamaiti, na iu ane ai ua iloga se tulaga lelei o le aiga o Asora Faamatua i totonu o le latou itumalo.