Sa lelei ona tapena e le ulugalii olaga o le la fanau

O le aso na fai ai le faauuga o le teineititi matua i le iunivesite aoao a Samoa i le Papaigalagala, na tetei ai lava le ulugalii o Asora ma Meaalofa, ua alapo ane le isi tuafafine o le tamaloa ua uma ona fai teuga, ae ua savalivali ane ma lana suiga ula mosooi, e foliga e fia alu i le malaga lea o le a agai ai le ulugalii i Apia e auai i le faauuga o si a la tama.

Ua moni lelei i tuafafine o Asora le isi muagagana faa-Peretania e faapea pe a faaliliuina, “Afai e te lē mafaia, e sili ai ona e auai atu i ai” (If you can’t beat it, then join it).

E lei manatua e le ulugalii le agaleaga o lona tuafafine lenei aua o le sifi lava lea o latou uma ia e fai le fia faatava ane i si fafine ma lana fanau. Na fiafia le ulugalii ma latou agai atu loa i le nofoaga sa fai ai le faauuga o le teineititi o Vanila.

O ina foi na toetoe ai a tagi le fafine o Meaalofa i le tiga i le tuafafine o lona toalua, ona e foliga mai, na fuafua lelei lava e le fafine o Lusi lana show lea o le a fai. Na ona faalau mai lava o le igoa o le teineititi o Vanila mo lona tusipasi, oso loa i luga ma le fafine o Lusi, le auntie o Vanila, siva loa ma alu le gutu ua pei o se laau suisui, e muliga ai foi le fafine sulatoga.

O le manatu uma o tagata i lea aso, o le tina moni lea o le teineitiiti lenei o loo tele ona faailoga taualoa i le latou vasega, aua o lea ua fai le mataupu a Lusi i totonu a o silamio uma le aofia na auai.

Na taumafai lava Asora e faatoatoa si ona toalua, ae o loo malamalama lelei Asora i lagona tiga o lona toalua, aua e oo foi ia te ia, na matua tumu i laua i le inoino i le mataupu a Lusi lea na fai.

Na semanu e le feita o Asora ma Meaalofa, pe ana faapea o se fafine e moni lona alofa i si a la fanau, ae o lea ua oso atu e fia iloa ma fia tagata i lea aso, sei faapea ai tagata ai o ia e ana le tama, ae leiloa o le tama a si fafine lea e amuamu ma fai i ai a latou tala i le tele o aso, fai mai o le fafine e lei aoga, ae ua maumau ai lo latou tuagane.