Na iai lava le isi aso na le mafai ai lava e le isi tuafafine o Asora ona tatali le matau‘a o lona loto, ma lafo ai lava se tala e peiseai e faaulaula ae o le mea moni lava ua masua mai i fafo le mea ua leva ona faatalatala i le mafaufau, fai mai o le lelei o le faasusususu o Asora ma Meaalofa i faiaoga, ma toaaga e fafaga faiaoga, lea ua maua ai avanoa o si a la fanau i aoga i Apia.
O si fafine o Meaalofa, ua tauau lava ina uma le lotomaulalo ma le agamalu ua alu ai le fia tausaga o olo pea le fua i uiga lotovale nei o tuafafine o lona toalua ia te ia. Ae o le tamaloa o Asora, ai o le mea tonu lea ae tau o le tagata fai tuafafine.
Aua e ui i nei uiga manu o teine ma a latou fanau i si tamaloa ma lona aiga, ae o le tauloto lea a Asora i lona aiga i afiafi uma e fai ai a latou faiga lotu afiafi, e apoapoai ai pea lava pea i lona toalua ma le la fanau, ina ia aua, aua lava nei iai se isi e mamulu se tala poo le gaoioiga e fai e fia taui ma sui atu ai i isi o latou tei poo isi foi tagata matutua e fai ane ni faamatalaga e faatiga ai.
Ma o le luitau tele lea e feagai pea ma si nei aiga, aemaise lava i si fafine o Meaalofa ma lana fanau, ona o nei lava uiga fuā o loo faaali ane e le aiga o lona toalua ia te ia, ma e maua solo mai lava e se fafine tala mai isi tagata o le nuu.
O le malosi tele o le leo toafilemu o le tamaloa i lona aiga, ua pei ai lava o se meanoa ia Meaalofa ma lana fanau uiga nei e faaali ane. Ua faagasolo pea aoga a nai tamaiti ma ua amata ona faaiuiu aoga a le isi toalua, ae ua amata foi ona laasia vaega sinia a le isi toalua.
Sa lei manao Asora e o lana fanau i ni avanoa sikolasipi e aooga ai i fafo, peitai na finau si fafine o Meaalofa, e sili ai pe a o i fafo si ana fanau e aooga ai pe afai ae maua ni o latou avanoa, ma afai lava o le a o atu ma nonofo ai, e lelei foi lena ia te ia, ina ia o ese atu ai ma lea ituaiga o olaga faatautava o loo ola ae ai i totonu o lo latou lava auaiga.
O uiga ma faamatalaga faatupu vevesi ia sa fai ane faapea e pepelo le au a nai tamaiti i aoga lelei i Apia, ua iu lava ina mou malie atu, aemaise ua oo tamaiti i aoga e le toe oo i ai se faasusususu a Asora ma Meaalofa e tusa o a latou tala, ma ua manino mai ai lava e atamamai nai tamaiti.
