Talu lava ona nonofo atu le tamaloa o Asora ma si ona toalua le fafine o Meaalofa, e lagona lava e le tamaloa tala le fiafia a ona tuafafine e faatatau i si ona toalua.
E tele tala a teine fai mai ua maumau le taimi na ave mamao ai i Apia e faaaoga, ae o lea ua toe iu atu lava i le teine o le nuu. Ae sei nofo ane foi la o se teine e tulelei se aiga, ae na o le mau avega e faatietie atu ai i le latou aiga, pe a oo nei foi ina fai sana ia fanau.
O tala faasausili lava nei a tuafafine o Asora na atili ai ona faamausali i le mafaufau o le tama, afai ae alofa le Atua e foai se fanau mo laua ma si ona toalua, o le a matua tuu atoa i ai lona malosi i le faaaogaina o le la fanau, ina ia iu manuia ma tausi ai laua, ina ia aua ai lava nei moni valovaloga a ona tuafafine nei ua amata ona fai e faapea, e tigaina nei foi latou e toe fafaga mai ma ia ma lana ia fanau, ona o le fia oso e faaipoipoi i le teine e lei lelei ni aoga.
Na faamanuia le Atua i le aiga. Ua fanau Meaalofa, o le teine si a la tama ulumatua. Na toe maua foi ma isi tamaiti ma toafa ai loa le fanau a Asora ma Meaalofa, ma sa taufai ponouai si ulugalii e faaaooga le la fanau, mai lava i le aoga tulagalua a le latou nuu seia oo ina amata ona maua mai aoga a tamaiti i Apia.
Na au mai le teine matua i le kolisi a tamaitai o le Sagata Maria i Vaimoso, ae o le isi teine na o uma ma ona tuagane e toalua i le Kolisi i Avele.
Atonu o le lelei o aoga a le fanau a si fafine e lei lelei ni aoga, na avea ma itu ua ese ai lava foliga o tuafafine o Asora ma a latou fanau, i si fafine o Meaalofa ma lana fanau.
