Ua tolusefulu tausaga o le tamaitai o Susana, o le lima ai lea o tausaga talu ona faaipoipo ma lona toalua, le alii o Mareko. O se mafutaga e mafanafana ma iloagofie lenei ulugalii i totonu o le nuu, o le ekalesia ma soo se tasi e iloaina i laua, i le malosi o le alofa o le tasi i le isi. E le o se mafutaga foi na tupu faafuasei, aua na aooga faatasi ma e o mai foi i le setete e tasi, aemaise o o la aiga sa tele ina iai ni o latou fesootaiga faapisinisi.
Peitai, ina ua faatoa lua lava aso talu ona tea le aso e atoa i ai le tolusefulu tausaga o Susana, ae faafuasei ona pouliuli atoa lona lalolagi, ina ua aafia i se gasegase ma sa faaletonu le faiga o ona togafitiga, ma mafua ai ona leiloa lana vaai po ua tauaso. Paga ni lagona o le le aoga ma le gaogao ua faafuasei ona lofia ai Susana, ua luluti ane foi lagona o le ita ma ua filia faatasi i mafaufauga le aoga ma le mou atu o se faamoemoe. ‘Aisea ua tupu ai lenei mea ia te au?’ o le fesili lea ua o se tui e sunui ai le fatu o Susana i aso uma, a o tagi lotulotu i lona mautinoa e le toe foi ane lava le malamalama i ona mata.
A o lei aafia Susana i lenei malaia faafuasei, o se tamaitai e ola finafinau ma e le fia toilalo i soo se faigata e tulai mai. O se tina talavou e naunau e faatino mea lelei ma ni mea fou na te iloa e ono faaleleia ai lo la aiga. O se tamaitai foi e atamai, ma e faigaluega i se tasi o ofisa o le malo, ae o lona toalua le alii o Mareko, o se fitafita sinia i le vaegaau a le atunuu. O le po faafuasei o le vaai a Susana, e ui o se mea matuitui ia te ia, ae ina ua faasolo pea ona mafaufauga ma ua tau toa malie ifo ona faalogona tiga, sa la talanoa ma lona toalua ma ia folafola ai, e le taitai ona fia toilalo i le mea lenei ua tupu ia te ia. Sa fesoasoani malosi foi le tamaloa o Mareko, e faalototele i si ona toalua ma folafola i ai, o le a ia faia mea uma e fesoasoani ai ia te ia.
E lei avea le suiga ua iai nei foliga o Susana, na suia ai sina iota e tasi o le alofa o Mareko ia te ia. O le mea moni, ua avea lenei faaletonu ua oo i ai Susana, ua atili ai ona malosi le alofa faamaoni o le tama i lona toalua. Ua amata nei ona lototele Susana e toe foi i lana galuega, ma sa faia le tonu o le a le toe alu i le pasi e pei ona masani ai, ae o le a usu muamua Mareko e momoli o ia i lona ofisa, a o lei agai atu Mareko i le isi itu o le aai mo lana ia galuega. O le auala lava lea e tasi e toe ui ai foi le tamaloa pe a manava i le afiafi, e toe foi atu lava i le isi tulimanu o le aai mo le pikiina mai o lona toalua.
Peitai na la iloa ua tele nisi taimi ua tuai Mareko i lana galuega pe afai ae pisi le auala i nei feoaiga e tele e fai i taeao uma. Ona toe talanoa lea ma ua malie foi Susana, o le a amata ona faataitai le toe alu e pue lana pasi. Sa ioe le tamaloa, ae na tagi masusu lona fatu i le mafaufau e peiseai ua agaleaga i si ona toalua pe a tuu nei na o ia e alu i le pasi. Peitai sa taumafai lava Susana e lototele ma faamautinoa i lona toalua e mafai ona ia faia le alu i le pasi i lana galuega.
E lua vaiaso o o faatasi lenei ulugalii i le pasi, a o taumafai Mareko e faasinosino uma i lona toalua vaega eseese o le auala e tatau ona ia matauina lelei, i lana oso i luga ma le toe oso ese i lalo. Sa fiafia foi le alii avepasi e fesoasoani ane i si tamaitai pe alu atu i le pasi. Na uma le lua vaiaso ona faapea atu lea o Susana i lona toalua, ua tatau ona aua nei toe sau ma ia i le pasi, aua o lea ua masani ma ua lava lona tootoo e la te toalua, ma le avepasi lea ua ofo ane na te faamautinoa i le mea e tuu ai o ia, aua e tu tonu lava le pasi i luma o le faitotoa e agai i le ofisa e faigaluega ai Susana.
Ua amata nei ona alu na o Susana. O taeao uma pe a maea le la malutaeao, ona sogi atu lea o le fafine i lona toalua ma savali loa i le pito o loo iai le fale faatali pasi. E oso fiafia i luga le tamaitai ma lona mautinoa, ua saogalemu lana faiga malaga. E lilo i manatu o Susana, o lea e oso ai lava ma si ona toalua i le pasi i taeao uma, ona saofai mai lea o Mareko i se isi nofoa, poo tua poo le nofoa fesagai i le isi itu, ma tilotilo pea i foliga lalelei o lona toalua a o saofai i le taimi atoa o loo alu ai le pasi. E feosofi faatasi le ulugalii i lalo, ona agai lea o Susana i totonu o lona ofisa, ae toe savali le tamaloa i le isi pito o le auala e pue le isi pasi e agai ai i le itu o loo faatali ai lana taavale.
Na oo i se tasi aso, ina ua tu le pasi ma savali atu Susana e totogi lona pasese, ona faafetai lea o le avepasi ma faapea ane i le tamaitai, ‘Amuia oe’ Ua tei le fafine ona toe faatautu lea ma faapea atu i le avepasi, ‘E faapefea ona faaamuia mai se tagata pupula i se fafine tauaso?’ Atonu na manatu Susana, e pei o loo aamu ane le avepasi ia te ia. Peitai na tali le avepasi, ‘Amuia oe e matua malupuipuia oe i taimi uma’. E lei maua lelei e Susana le uiga o upu a le avepasi ona ia toe fesili lea, ‘O le a ea le uiga o au upu?’ Sa tali le avepasi, ‘O e silafia ea tamaitai, e ese le aulelei o le alii fitafita lea o loo faafeaoina mai lau faiga malaga i taeao uma? E le mafai ona alu ese seiloga lava ua ia faamautinoa ua e agai i totonu o lou ofisa, ona fa‘alo atu lea o lana faatofa ma toe alu ese atu.’
Ua tei le fafine o Susana ma e tasi lana mate, o lana Mareko lava lea e uiga i ai le tala a le avepasi. O lona lava manatu o lea ua leva ona tuua na o ia e sau i le pasi, ina ua uma le lua vaiaso sa fai ai a la faataitaiga ma si ona toalua. Na taunuu Susana i lona ofisa, ona saofai ifo lea i lona nofoa ma tagi. Ua mafaufau le fafine i le moni o le alofa o lona toalua ia te ia. Ua ia toe mafaufau i le taimi o le la faaipoipoga ma a la tautoga na fai, lea lava o loo tausi faamaoni i ai si ona toalua. Na toe soloi mata o le fafine, ona fai lea o lana tatalo, ua faafetai ma saga faafetai i le Atua, ina ua faamanuiaina o ia i se tane e alofa faapelepele ma tausi faamaoni ia te ia.