Laauli Leuatea – Fofoga Fetalai (Gagaifomauga Numera 3)
Agafili Patisela – Sui Fofoga Fetalai (Palauli i Sisifo)
O le sui faipule e toalua mai Savaii ua tusi aao i ai le faafaletui o le HRPP e seei i le faafoeina ma le vaaia o taualumaga a le Palemene lona 15 a le atunuu, o le a faatautoina i le faaiuga o lenei vaiaso.
O le susuga Laauli Leuatea Polataivao Fosi ua lua nei paeaiga a le Palemene o filifilia mai e le itumalo Gagaifomauga Numera 3, ua avea ma Fofoga Fetalai, o se tofiga e talitonu nisi o faipule ua toe pale mai i tofi o o latou itumalo, ua talafeagai, auā sa avea Laauli Leuatea ma Sui Fofoga Fetalai i le paeaiga lona 14 na faata‘ape i le amataga o le tausaga nei, a o loma le faigapalota.
O le sui faipule filifilia fou o Palauli i Sisifo, le tofa Agafili Patisela Eteuati Tolovaa ua filifilia e avea ma Sui Fofoga Fetalai.
O le lē toe filifilia o le sui faipule o Aana Alofi Numera 2, le tofa Tolofuaivalelei Falemoe Leiataua e avea ma fofoga o le fono, ua atagia mai ai le faaono filifilia i le kapeneta fou o le a faalauiloa i le Aso Faraile nei pe a tauaofia le paeaiga lona 15 i lana tauaofiaga muamua i le tuanai o le palota a le atunuu i le amataga o lenei masina.
O le Ao Mamalu o le Malo o le a faatautoina le Fofoga Fetalai filifilia, faapea le Palemia ma lana kapeneta fou.
O le Fofoga Fetalai o le a ia faatautaia le faatautoga o sui faipule uma o le Palemene, ma o le faasologa masani lea, seia vagana le filifiliga sa masani ona faato‘ā faia i le Palemene mo le Fofoga Fetalai ma le palemia, ua lē toe faatinoina ina ua suia le faavae ma faaofi ai le faia e le vaega faaupufai ua manumalo o le filifiliga, ae faato‘ā faatauto ma faamaonia aemaise le faalauiloa i le uluai tauaofiaga.
