Pule le tamafanau Samoa ofisa o turisi Amerika Samoa

Ua filifilia e le Komiti o Faatonu a le ofisa o le faigamalo a Amerika Samoa se tasi o tamafanau a lo tatou atunuu i Niu Sila, le susuga David Vaeafe e avea ma uluai Pule Sili o le ofisa o tagata tafafao mo Tutuila ma Manu‘a. O le filifilia o lea alo o le atunuu ona o loo ia umia ni tomai tau i le atinae o tagata tafafao, ae le gata i lea e iai ona tomai faatusitala e pei ona masani ona manumalo ai foi i nisi o tusitusiga e le gata i polosiua a o luga foi i upega o fesootaiga, mo nisi o faalapotopotoga ma kamupani a le Pasefika sa moomia lona tomai tau tusitala.
Sa masani foi ona aofia lenei alo o le atunuu i nisi o sailiiliga e pei o le Journal of Travel Research, ma sana fesoasoani foi sa faia i le vaega o loo aoaoina ai tomai tau auaunaga mo turisi, i le iunivesite a le AUT i Niu Sila. O nei tomai uma o le susuga ia Vaeafe o le a fesoasoani tele i lona tulai mai e pulea le ofisa o turisi a le teritori.
Taua i lopiti pe tusa ma le 20 i latou na talosagaina lenei avanoa taua i totonu o le teritori, ae ua tusiaao le komiti i lenei alo o le atunuu ma lo latou faatuatuaga, o le a matua tele se sao o Vaeafe i le faaolaolaina o lea foi atinae taua mo Amerika Samoa.
Sa galue David Vaeafe mo le ofisa o tagata tafafao i Samoa i le vaitau o le 1996, lea sa galue ai i le faatuina o le ofisa o le pulega o tagata tafafao a le Malo o Samoa i Aukilani i Niu Sila i lea vaitaimi ma galue ai mo le valu tausaga e pei ona faaalia i se pepa o faamatalaga. E filifilia nei o ia mo lana galuega fou o loo avea ma faauluuluga o polokalame a le faalapotopotoga o le Pacific Cooperation Foundation le PCF, o se faalapotopotoga tumaoti e faia se tautua mo le siitia o soifuaga o tagata.
O nai tausaga e lei mamao atu sa faia ai se fonotaga a le au faasalalau i leitio ma televise i le Pasefika i Samoa, ma sa taulamua ai lea faalapotopotoga. O le faaiuga o le masina fou o Aukuso o le a amata ai David Vaeafe i lona tofiga fou o le a galue ai i Amerika Samoa.