Pue e le South Pacific Pictures fono a le Palemene

O fale televise i Samoa ma pisinisi pue ata sa tuuina atu a latou ofo e pue ai taualumaga a le Palemene, ua lē manuia a latou ofo ae filifilia ai le kamupani pue ata tifaga o le South Pacific Pictures, o se pisinisi tumaoti o loo pulea ma faafoeina e le susuga Fiu Tanupo Aukuso ma lona faletua o Taufau Gardenia Aukuso.

“O se mitamitaga ia te au le faaiuga ua manumalo ai se talosaga e avea lenei auaunaga e faia se galuega lelei e tautua ai le Malo ma le atunuu”.

O le finagalo lea o Fiu ina maua se avanoa e fesiligia ai e tusa ma le galuega ua latou faatinoina.
O loo silafia e le toatele lea kamupani pue ata i se ata tifaga na latou pueina, le Tautoga Gausia.
O le Aso Faraile, 17 o Iuni 2011 na feiloai ai le alii pule ma le afioga i le Fofoga Fetalai, Laauli Leuatea Polataivao, ma faailoa ai le filifiliga ua taunuu i ai le finagalo o le ofisa o le fono aoao.

O se taimi muamua lenei i le talafaasolopito o le Palemene o le atunuu ua pueina ai taualumaga a le Fono Aoao, auā o tausaga ua mavae e oo mai lava i lenei vaitau ua na o le leitio a le Malo le 2AP i Mulinuu o loo faasalalauina tuusa‘o.

Sa latou pueina foi taualumaga a le Fono mo a latou lava faamaumauga, e ese mai ai i le galuega a le Fono Aoao i le pitolaau a i latou o nafa ma faamaumauga o taualumaga a le Fono Aoao.

E lei mafai ona faailoaina mai e le tofa Fiu Tanupo Aukuso le tau o lana ofo o loo faia ai le galuega.
“Ou te lagona sa fesoasoani mai le Malo i la‘u pisinisi ma o se isi foi lea tulaga sa silasila mamao i ai i le tuuina atu o le tau o le matou auaunaga”.

O le feagai ai o le South Pacific Pictures ma le pueina o le uluai ata tifaga o le Tautoga Gausia na foai ai e le Malo le $50,000 e fesoasoani i le atina‘ega o lea taumafaiga auā o se tautua e faalauiloa ai ma Samoa i atunuu i fafo. O le TV1, TV3, Kingdom TV ma nisi o pisinisi pue video sa tuuina atu a latou talosaga i le fia maua o lea galuega.

O le taimi nei e lē o mafai ona faasalalauina sa‘o e se faletelevise taualumaga uma o le fono usu a Samoa seia vaganā lava taimi e tatala ai le paeaiga ma tapunia ma faataatia le tala autū o le tupe.

I se finagalo o le Fofoga Fetalai na ia ta‘ua ai, e manaomia le teuteu o tulafono e avanoa ai ni faasalalauga tuusa‘o a se faletelevise o taualumaga uma, ae mo le taimi nei e leai se fuafuaga faapea seia vaganā le tautua a le leitio a le Malo.

O taualumaga ua pueina ata ma taga ma le leo o le a tāua mo faamaumauga a le Fono Aoao, aemaise lava pe a iai i mataupu e tāpā ai e le faamasinoga pe o nisi suesuega faapalemene.