Ua momoli le faafetai a le Palemia susuga Tuilaepa Lupesoliai Sailele Malielegaoi, i le tulai mai o le afioga i le Aloalii, Vaai Papu Vailupe, ma le afioga Palusalue Faapo II, i le taitaiga o le Itu Agai poo le vaega faaupufai o le Tautua Samoa. Na saunoa le Palemia i lana saunoaga faafetai ma ia ta‘ua ai o lea faato‘ā toe iai se itu faaupufai e agaia le Malo.
O le faamalo ma le faafetai a le taitai o le HRPP e faasino i le galulue faatasi o itu uma o le maota i atiina a‘e ma tonu fai, ae o lona popolega, ina ne‘i iai ni tulaga faaletonu e ono aliali mai i le maopoopoga o le itu agai a o faagasolo lenei paeaiga fou a le Palemene lona 15 ua tau amata mo le nofoaiga e lima tausaga. O Vaai Papu o se tasi sa avea ma sui faipule o le HRPP faapea foi le afioga Palusalue Faapo II.
O le saunoaga a le Palemia na ia faaalia ai, o le mau malosi lea e faamaonia ai, o le HRPP ua matua i faiga upufai o le Malo o Samoa. O se vaega o lana saunoaga e foliga e faaataata lafoga na ia ta‘ua ai, ua fai le fanau a le HRPP, ma ua tuu le saolotoga i le fanau e filifili ai. E faasino lea i le afioga Vaai ma Palusalue, ua suia le itu faaupufai ua la galulue ai aemaise o le fesagai ma Tuilaepa ma le HRPP i lenei paeaiga o se Itu Agai aloaia i totonu o le Palemene.
O le maopoopoga o le Tautua Samoa na amata molimauina le maluelue, a o tau tuu faatasi ma isi pati laiti a o lumanai le faiga palota. O le sailiga foi o ni taitai o lea pati faaupufai sa iai ni to‘a sa tau tuta‘ia ai, ae na maua le finagalo autasi o sui uma o pati laity ma filifilia ai Vaai ma Palusalue e avea ma taitai mo le faiga palota, i le aiaiga e toe sailia ni taitai pe a mae‘a le palota.
O le tuanai o le faiga palota na toe feiloai ai sui na manumalo e to‘a 13 o le Tautua Samoa ma toe tusi aao ai e aunoa ma se faiga palota, e tauave pea e Vaai ma Palusalue le taitaiga o le pati.
O le popolega o le alii Palemia e afua mai i le Itu Agai na taitai ai le afioga Le Mamea Ropati le SDUP ina ua mae‘a le palota tele o le 2006.
E lei atoa se ono masina o le tausaga muamua o lea paeaiga faapalemene, ae malepe le maopoopoga o le SDUP sa sui taitai ai le tofa Asiata Saleimoa Vaai. Na iu ina malepe ma salalautasi ai ma avea ai sui faipule uma o lea Itu Agai ma sui faipule tutu toatasi.
Ua tautino le afioga Vaai Papu o le maopoopoga o le Tautua Samoa ua mausali ma o se Itu Agai o le a matuā malosi i totonu o felafolafoaiga a le Palemene. Ua faaalia e le Palemia susuga Tuilaepa, ua faafiafiaina le atunuu auā o lea ua toe iai se Itu Agai e aloaia i galuega faapalemene a le Malo Tutoatasi o Samoa.
