O le faamatalaga lea a le faauluuluga o le Ofisa o Atina‘e a Malo Aufaatasi i le Pasefika, o Nileema Noble. O le faaaliga a lea tamaitai, o le tuufaatasiga o taumafaiga a atumotu o le itulagi o loo tulaga lelei mai ai le vaaiga ia Samoa ma ana taumafaiga, ina ia oo atu i le taimi faatulagaina a atunuu o le Lalolagi, le 2015, ua telē se galuega e mafai ai ona faapea, ua ausia e Samoa le tele o manulauti nei na tuu mai i atunuu uma e ausia.
Ae o le toe iloilo lelei atu o nei manulauti taitasi ua manino ai, o loo iai se tulaga ua agai i tua taumafaiga a Samoa e ausia manulauti o le Meleniuma.
E pei lava ona silafia e le atunuu o tuutuuga ma aiaiga nei na faataatitia e Malo Aufaatasi mo ona atunuu uma ia o loo i totonu o le li‘o lenei o atunuu o le lalolagi, ma na faapea foi ona fesoasoani malo atia‘e i malo laiti ina ia mafai ona ausia le tele o manulauti ua faataatitia mai.
O le itu tāua lava ina ia tafiesea le ola mativa ma le lē tagolima. Ia maua le ola a‘oa‘oina, ia lelei le tulaga o le soifua maloloina, ia maua meaai ma ia aua ne‘i ola fia aai tagata o le lalolagi. Ia siitia le tulaga o tamaitai ina ia mafai ai ona faapea atu, ua tutusa o latou soifua ma le tulaga o alii. Ia iai avanoa e atina‘e ai atunuu ma tagata taitoatasi ma ia maua le puipuiga o le siosiomaga.
O Samoa lava la ia, na ta‘ua e lenei tamaitai i le fono o le vaiaso lenei, na talo ai faalapotopotoga tumaoti ma pisinisi o soo se ituaiga i Samoa, e omai mo le uluai taimi nei vaega uma o le atunuu e soalaupule poo ā ni auala e mafai ai ona galulue uma e unai nei atina‘e. Ae o ā foi auala e mafai ai ona faalelei atili le galuega o loo fai e Malo Aufaatasi e fesoasoani ai i nei atina‘e.
O lea foi na fesiligia ai nisi auala e manatu faalapotopotoga eseese a nuu ma faalapotopotoga tumaoti ma le ‘au faipisinisi, pe iai nisi auala e tatau ona lelei atu ai le faatinoga o le auaunaga a Malo Aufaatasi i le atunuu e tali atu ai i faafitauli ia e foliga mai e lē o o ese ae e pei ua faatuputupulaia.
Faaalia i se lipoti na tolaulau i lea fonotaga, e 37 miliona lava na faapea ona faamatuu mai mo tausaga e fā mo atunuu e fā nei o le itulagi e pei o Niue, le Atu Kuki, Samoa ma Tokelau. O le tele o lea seleni o loo pamu mai i totonu o galuega a Samoa mo le faaleleia o le siosiomaga, ma le tele o isi atina‘e e pei ona ta‘ua auā lava le unaiga o manulauti o le Meleniuma.
“O le lipoti ua aoina i Samoa ua iloa ai, o loo lelei le agai i luma o Samoa i lona siosiomaga tau i pulega faalemalo ma le unaiga o le tamaoaiga, ae a latalata loa le vaai pe a faataatitia taitasi mai manulauti, o inā ua iloa ai ma se popole, le tulaga agai i tua ua iai nisi vaega o lenei taumafaiga,” o se faaaliga lea a le Sui o Malo Aufaatasi i le Pasefika i sana folasaga, le tamaitai o Nileema Noble.
Faaalia foi e lenei tamaitai o le isi o itu tāua o loo unaia e Malo Aufaatasi e foliga mai o loo faatuputupulaia le tulai mai pea i Samoa o sauāga faasaga i tamaitai, ma o loo tele galuega ua faatino e tau faaitiitia ai, ae e lē o agai i lalo ae foliga mai o loo faatuputupulaia pea.
O loo agai pea foi i luga le lē tagolima o tagata Samoa, lea ua ta‘ua ai e 4 pasene le siitaga o le ola mativa i Samoa i lenei tausaga.
O lea ua galue Samoa e faasā tamaiti mai i le lima i le 14 tausaga ona nonofo i le fale ae lē aooga. O le suesuega a Malo Aufaatasi ua iloa ai e 93% o tamaiti i le matutua lea ua aooga uma ae o loo iai lava le isi 7% o loo i tua lava i aiga poo loo feoai solo lava e fai isi feau ae lē o faaaoogaina.
O le tausaga lenei na ta‘ua e le afioga i le Ofisa Sili o Aoga o loo ua faamamalu ai nei faasalaga faasaga i mātua e lē o faaaoogaina o latou alo i le matutua e pei ona faatulafonoina nei, ma ua unai foi le agai o sui o le Matagaluega ma isi matagaluega o loo galulue faatasi e pei o Leoleo, Matagaluega o Tina ma Tamaitai, Atina‘e o Nuu ma Aga Fesootai, ina ia mafai ona siaki aiga ma le taulaga i fanau e lē o agai lava i aoga.
Ua iai foi se polokalame a faalapotopotoga e pei o le Toomaga mo Tagata Puapuagatia ina ia mafai ai ona ofo atu ni a‘oa‘oga mo isi fanau e lē o agai lava i aoga e ui o lea ua faamalosia le tulafono.
O le Soifua Maloloina o loo iai lava popolega i le itu tau i le soifua fanau o tina ma faafitauli e tulai mai pea i Samoa i lea vaega o le soifua maloloina o tina.
O loo agai foi le suesuega lenei a Malo Aufaatasi i faafitauli tau i le Siosiomaga e tatau ona ausia e Samoa le faaleleia, ae o loo matauina le faigata ona faaleleia.
O nei popolega uma na folasia e Malo Aufaatasi ma le faamoemoe o le a maua ni tali mai i sui nei o afioaga, faalapotopotoga tumaoti ma aiga faipisinisi ina ia tali atu ai ma faaitiitia.
Faaalia e Malo Aufaatasi, e leai se aogā e unai mai ai fesoasoani ae e lē o vaaia ni tali ma o le a tele se taimi o lenei ofisa ma ona lala uma ina ia saga unaia ai manulauti o le Meleniuma, ina ia aulia atu le tausaga e 2015 ua faapea mai Samoa, o lea ua tele vaega o fuafuaga faataatitia nei a Malo Aufaatasi ua mafai ona ausia.
O le isi lava foi unai na lāgā i lea fonotaga, ina ia mafai ona see ese Samoa mai i lona tulaga o se atunuu aupito mativa i le Lalolagi (LDC) ae e pei lava ona vaaia, o le agai mai pea o faalavelave faalenatura, e pei ua toe foi ai i tua le tele o taumafaiga a Samoa mo nei atina‘e uma.
O le faamatalaga a le tamaitai o loo fai nei ma sui vaaia o Malo Aufaatasi i Samoa ma isi motu o le Pasefika, e malosi lava le manaoga i le taimi nei e faapea mai o le tagata lē tagolima ma le mativa i Samoa e iai lana aiā tatau e maua ai auaunaga e tatau ona ia maua, ae lē faapea o se faamanuiaga lea e tatau ona maua.
E tatau ona maua le taumafa, maua le vaiinu mamā, maua le avanoa e aoga ai, maua le avanoa e nofo ai i se nofoaga malu ma le saogalemu, ma ia saoloto mai i sauāga ma isi faafitauli e ono lamatia ai lona soifua. E tatau foi ona maua auala e togafitia ai pe a maua i gasegase, ma e iai le aiā e sao atu ai sona leo i soo se filifiliga fai i totonu o aiga, nuu ma lotu.