Ua tele fesuiaiga o le tau ua vaaia i lenei vaitau, a o feagai ai foi atunuu e pei o Niu Sila ma Ausetalia ma le vaitau o le malulu.
Mo Samoa o le vaitau lenei o mugala, ae ua agai ina malulu foi le po.
O loo vāvā le toulu o timuga ma ua amata vaaia le faasoasoa o le suavai i nofoaga tumutumu e pei o le taulaga o Apia aemaise nofoaga e pei o Vailele, Vaitele ma isi itu o le Vaimauga.
O le popolega ua faalauiloa e le Pulega o le Suavai, ua utiuti foi le suavai maua ma ua maualalo le timu ua pa‘ū i lenei vaitaimi o le tausaga i Samoa pe a fuafua i le vaitau lava lenei i le tausaga ua tea nei.
O le faaaliga a Moefaauo Titimaea, o le maualalo o le timu palasi ua matuā aafia ai le faasoaga o le suavai i nofoaga e pei ona ta‘ua ma ua amata foi ona taofiofi le Pulega o le suavai ma ua tuuvaitaimi le ola a le paipa i lea nuu ma lea nuu ina ia mautinoa e maua le suavai e tagata uma i lea aso ma lea aso.
Na faaalia e Mulipola Ausetalia Titimaea, le alii Ofisa Sili Lagolago o le Vaaitau – o le taimi lenei ua tusa ua 13% (pasene) le fua ua laititi ai le suavai palasi i lenei vaitaimi lenei o le tausaga mai i le tausaga na tea nei, ma o le valoaga o le isi tolu masina o le a vaaia ai le suiga ma ua iai le faamoemoe o Mulipola atonu o le isi tolu masina lea e amata atu ia Setema o le a toe foi ai le suavai maua i le tulaga maualuga sa iai.
“O le taimi lenei ai seiloga ua sosoo se vaiaso pe lua foi vaiaso e lē malolo timuga, ona faato‘ā lava lea o le suavai faasoa,” o se faamatalaga lea a le Pule o le Suavai.
I Vailele lava ia ua toe foi le toatele i le asu vai ua faaaogā ai paelo mai i tane vai o loo tutū i autafa o le hall a le EFKS i le afioaga ma o iina lea ua faaputu ai le suavai mo le tau faasoasoaina.
E lē na o Vailele la o loo feagai ma lea faaletonu, ua faaauau foi ona vaaia le saili suavai o le atu Aleipata aemaise i nofoaga fou ia ua see i ai le toatele o lea itumalo ona o le sunami o le tausaga na tea nei. Ua toe o se masina atoa le tausaga talu ona tulai mai lea faalavelave ae o loo tau faasolo lava le fausia o paipa auā le ta‘i atu ai o le suavai i ia nofoaga.
O le faamatalaga a le Pulega o le Suavai e lei mae‘a lelei lava lea galuega ona o loo maualuga foi nofoaga fou aemaise o le tele o aiga ua manaomia vave le suavai ma e tatau ona oo atu i le faaiuga o le tausaga ua mautu uma le suavai maua i lea itu o Aleipata e aofia ai Lalomanu, Saleapaga ma nuu tuaoi.
