O le finauga lea a se alii ua 63 tausaga le matua ua faamaonia lona mataifale i lona lava afafine.
O le asō e tulai ai lea alii i luma o le Faamasinoga Maualuga ma le alii faamasino Niu Sila o Pierre Slicer e saili ai po ua talia e lea alii Faamasino le talosaga a lenei tamā ina ia totogi sana sala tupe ae aua ne‘i avea o ia i Tafaigata.
Ua faia lea talosaga ina ua laga e le alii Faamasino, o lona lava manatu e tatau lava ona sala lenei alii i le toese auā o lea ua faasala foi lona afafine na ia faia i ai ni uiga matagā ma mataifale ai. Sa ioe e lea tamaitai moliaga lava o le mataifale ma ua amata nei ona tuli lona ia faasalaga o le nofosala ai i le toese, ae na matuā teena e lona tamā lea moliaga ma iu ai loa ina faia le iloiloga o lenei mataupu i Mulinuu, lea ua mae‘a ma na tālia se faaiuga a le Faamasinoga i le vaiaso na tea nei.
O le asō la ua toe tolopo mai ai lea mataupu. O le loia o Tuala Karanita Enari o loo tulai mo le tamā lenei ua faamaonia le solitulafono, na faia le talosaga i le Faamasinoga ona o le manatu e telē le aafiaga o lenei tamā pe afai e falepuipui.
E faamautu lenei alii i Ausetalia ma lona toalua ma lana fanau.
O le teine lea na aafia o lana ulumatua lava lea ae e ese lona lava tina o loo nofo lava i Samoa.
O lea alii o loo maua foi faamanuiaga tau tupe ona o lona matua ma o loo maua ane i Ausetalia, afai e taofia faafalepuipui ua taofi uma le totogi ane i ai o ia faamanuiaga.
Ua leva ona tetea lea alii ma le tina o le teine na aafia ma na malaga loa i fafo ma fai ai le isi toalua ae tuu ai le pepe lenei ua ia toe osofaia ina ua matua.
Na tausi le teine e mātua o lona tina ae o le tolu tausaga talu ai na toe feiloai ai loa lea tamaitai ma lona tamā i Ausetalia, ma o iinā lea e masalomia na amata mai ai loa le va lenei faasolitulafono.
O le iai o le tamā lea i Samoa i se isi ana asiasiga ua fai ma malaga mai ai e asi lona afafine ua fai sona aiga ma sana fanau, na maua ai loa e le toalua o lea tamaitai le solitulafono lea ua faaulu ai le tagi ma lotea e le Faamasinoga.
O le talosaga la a le itu a lea alii, ina ia mafai ona maua le avanoa e toe malaga ai i Ausetalia ma ia faaauau pea ana faamanuiaga o loo maua mai i Ausetalia, peitai na ta‘ua e Slicer, e vaavaai lava foi le Faamasinoga i lenei mataupu ogaoga ma o le a maua se tali sa‘o i le asō pe a toe tulai lenei alii mo se iuga mautu.
O le talosaga a lenei alii na ala mai i lana loia, poo le ā lava le maualuga o se sala tupe o le a taumafai lava e saili ma totogi, ae e lē fia alu i le falepuipui.
