Tufi taufao manuia o le Atua
O se vaaiga matautia sa iai le vaiaso ua mavae, i le hall a Samani Pulepule i Magele, i le faatumulia i tagata mai ekalesia taitasi na molimauina le polokalame a le susuga i le faafeagaiga ia Joe Amosa. E lima aso na faagasolo ai lenei faamoemoe, ma na amata mai i le afiafi o le Aso Lulu seia oo i le po o le Aso Sa.
O afiafi o aso taitasi sa faia ai sauniga faalelotu ae o le taeao o le Aso Faraile ma le Aso Toonai na faatinoina ai ni semina mo le aufaigaluega totofi a le Atua faapea le lautele o tagata mai ekalesia eseese.
O le toatele o susuga i faafeagaiga ma o latou faletua sa auai faapea foi nisi mai isi tovine na vaaia ai i ia po o le polokalame. O le autu na faamamafaina i nei aso, “Ia aoaoina oe” o le faalauteleina o le mau a le auauna a le Atua, o le mea o loo e galue ai, o e nofo ai, aua e te tuua ia nofoaga a o lei aoaoina oe i ni mea lelei i nofoaga ua valaau ai le Atua ia te oe.
O le po o le Aso Sa na faamae‘a ai nei sauniga. O le Ekalesia Faapotopotoga a le Atua i Otara na latou taitaia le polokalame. Sa faatinoina ai foi ni faaevagelia mai isi ekalesia faapea le ‘au a le Rhema na latou faatinoina se tala e faatatau i vavega a Iesu.
Na molimauina faamanuiaga a le Atua i lana fanau i ia po, ma sa vaaia ai foi le toatele o i latou ua maua le meaalofa o le tautala i gagana eseese e pei ona molimau ai le afioga a le Atua.
Na sosoo ma le saunoaga a le taitai aoao o le ekalesia i Niu Sila le susuga i le faafeagaiga ia Motu Matia e molimoli ai le agaga faafetai i le failauga mai Samoa e tusa ma lana tufa mai i le upu a le Atua.
O nei polokalame uma i po ma aso taitasi na faatautaia lava e le susuga i le faafeagaiga ia Sauafea Faatuatua Pulepule. O le aoga Tusi Paia a le Samoan Assembly of God in NZ na latou fuafuaina lenei faamoemoe mo le manuia o alo ma fanau, ae ua maua ai le avanoa e faasafua ai le upu a le Atua mo le lautele o le atunuu faapea tovine taitasi.
