Na matuā faatumulia le malumalu o le Enjoy Church i Sunshine i tupulaga talavou o le Ekalesia AOG i le po o le Aso Toonai na mavae atu. O le faauluuluga o le Ekalesia o le susuga ia Onesemo Pulepule ma lona faletua, o la latou autalavou foi na faauluulu i ai le polokalame i lea po.
Na auai uma autalavou mai isi lala o le Ekalesia i Melepone lava, ae o le failauga faapitoa o le faamoemoe o le susugai le faafeagaiaga ia Lynette Reed mai le AOG i Mt Roskill i Aukilani, lea na malaga mai ma lana autalavou ma faafiafia faapitoa ai mo tupulaga lalovaoa a le Ekalesia o galulue ma tautua i Melepone. Na faateia foi le matamata a Ausetalia i le malolosi o tifiga a le Kiwi i lea po, ae lei talia lava i ni vai e le kagalu.
O le agaga maualuga o le taitai aemaise o le mamalu i le aufaigaluega, e aogā le faaauau o mafutaga nei auā le faamasani o le tupulaga ma iloa ai e isi talavou isi talavou, aemaise lava o le ola feavata‘i ma le fealofani, atoa foi ma le ola faapaiaina mo le Atua.
Na molimau nisi o talavou i lea po, o se mafutaga tāua ma le manaia tele mo o latou ola tau atia‘e, ma o se luitau foi mo le agai i luma. E viia le Atua mo polokalame faapenei e suia ai olaga o alo ma fanau, e lē gata i totonu o Ekalesia, ae o va tapuia i totonu o aiga.
