O le faatalaleleiina ma le toe fuataina i le faaolataga a le Atua, o se tasi lea o sini sa fai ma tumutumuga o tapenga ma sauniga faaevagelia sa faatinoina i se mafutaga e lua aso e pei ona molimauina i le malumalu a le Ekalesia Livingstone Evangelism Ministry i Magele.
O nei sauniga faaevagelia sa tapenaina e le vaega o loo nafa ma le faatinoina o tala faaleagaga a le ekalesia.
O le po o le Aso Faraile sa uluai faataunuuina ai lenei faamoemoe, ma e toatele i latou sa molimauina le tele o feau taua na momoli mai i tala e sa faatinoina.
E le gata i tala ae faapea foi pesepesega ma viiga o le Alii, ae sili ai le Upu faauuina a le Alii e pei ona sa folafolaina e Lana Auauna, le susuga i le faafeagaiga Pastor Kuki Aloalii.
O le ata foi lea o le po o le Aso Toonai lea sa faamaea ai lenei faamoemoe ma o ni sauniga sa faatumulia i le faauuga a le Agaga Paia.
O le naunautaiga a le susuga i le faafeagaiga, ina ia aoga nei po e lua ina ia liuliu ai se agaga mo le faaolataga, ma talia Iesu Keriso e avea ma Alii ma Faaola i lona olaga.
O se tasi foi o faanaunautaiga ina ia aoga nei polokalame i se tasi ua tau lagona le faavaivai, ina ia toe faamalosia ma saga mauaa ai lana filifiliga i le Atua ma tumau ai i le faaolataga.
O nisi o feau sa faapupula mai i lenei lava faamoemoe o le toe faamanatu atu lea i tagata, ua na o Iesu le Ala i le ola e faavavau.
E le gata i lea, ae e iai le iuga o le tagata i tua atu o le oti, o na iuga e lua lava ona taunuuga, o le ola e faavavau, pe o le afi foi e faavavau, ma o le taimi lava lenei e fai ai le filifiliga a le tagata a o iai le avanoa, aua e leai se isi e toe filifili i tua atu o le tuugamau.