I le fetaiai pea o Samoa i faafitauli i totonu o aiga, aemaise lava le sauaina o tina ma fanau, o lea o loo faagasolo ai pea polokalame faalauiloa a le faalapotopotoga o le Mapusaga o Aiga. Sa maua se feiloaiga ma le Tamaitai Pule o le Mapusaga o Aiga, Salanieta Uesele, lea na ia faaalia ai, o loo molimauina lava i le Faamasinoga le tele o Faaiuga ua faia i le sauaina o fanau laiti, i soligatulafono o le faaoolima mataga, faigaaiga faamalosi, ma le tele o nisi o solitulafono.
Ua molimauina foi i totonu o Polokalame faagasolo, le aafia lava o nisi o fanau teine laiti i o latou tama moni, o nisi o le aiga poo tausoga foi.
O le faagasolo ai la o nei polokalame, na faaalia ai e Salanieta, e tatau lava ona malosi aoaoga, ona o le toatele o latou e le malamalama. E faapea foi ona le malamalama ai ma matua, e pei o le tulaga i le le lelei o le puipuiga o le fanau. E faatoa vevesi lava ma saili fofo solo ina ua tupu mai se faafitauli i fanau, poo le ogaoga foi o le faafitauli.
Faaalia e Salanieta, o nisi lava tina e le o matua mamafa ia i latou o latou tiute o le vaaiga lelei o le fanau, aemaise lava o fanau teine laiti. O le agaga lea o le faalapotopotoga o le Mapusaga o Aiga, ina ia unai malosi ana polokalame faalauiloa mo le atunuu, ma ia avea pea le faalapotopotoga, ma sulufaiga poo le mapusaga o nai aiga.
O le tele o nisi ulugalii poo aiga foi i le atunuu, ua matauina ai le tulaga vaivai tau aoaoga o le tina, ma ua avea lea ma auala e avea ai le tama ma faalagolago malosi o le aiga. Ua avea lea tulaga ma pogai e taotaomia ai lagona o le tina, poo le le amanaiaina foi, talu ai se solitulafono ua faia e le tama o le aiga.
Ua matauina nei itu i totonu o le faamasinoga, i le taotaomia, omia, tanumia ma ufiufi lagona ma le leo o le tina, ina ia saga malu ma ufiufi lelei le amio leaga a le tama, poo se isi foi solitulafono ua faia e le tama o le aiga i le fanau teine laiti.
Faaalia e Salanieta, o le ala lea e taua ai nei polokalame e faailoa atu ai i tina, ina ia feala i luga ma ia aua nei avea nei aga o le olaga, e taofia ai lona tu malosi e puipuia ma vaai lelei lana fanau teine laiti. Faaalia e le pule o le Mapusaga o Aiga, e taua ai la le aoaoina lelei o tina i nei tulaga, ina ia avea i latou ma fofo o faafitauli i totonu o aiga. Ia faia i latou ma tali o le sauaina o a latou ma fanau laiti.
O le aso 29 o le masina nei, o le a faataunuu ai polokalame a le Mapusaga o Aiga i le Itumalo o Lefaga, i afioaga o Matautu, Gagaifo ma Savaia.
Ua faaalia foi e le tamaitai pule, o loo avanoa pea le faalapotopotoga ma ona sui, mo aiga, o fanau poo tina foi o loo mafatia ma pologa i sauaga i totonu o aiga, ia faafesootai le Mapusaga o Aiga, i le NiaMall i Taufusi mo se laveai ma se fesoasoani.
