O le savali a Keriso. O le autū lea ua faaulutalaina ai le polokalame o lenei tausaga a le Ekalesia Faapotopotoga a le Atua (AOG) i Mt Wellington, lea o loo tausi matagaluega ai le susuga ia Matafala Lesa ma le faletua ia Tine Lesa.
O se vaaiga uigaese i le malumalu a Matagofie i le Aso Sa ua mavae i ekalesia sa auai e molimau le polokalame mulimuli o lenei tausaga. E tolu aulotu sa valaaulia i lenei faamoemoe ae na o le lua sa mafai ona auai, o le ekalesia mai Papatoetoe faapea le ekalesia mai Otahuhu.
E silia i le 60 matafale o loo galulue, e ese mai ai ia i latou o loo fesoasoani i le galuega a le Atua. O lenei faamoemoe o loo taitaia e le susuga ia Fesoloai ma le faletua ia Orepa faatasi ai ma le lagolago a le susuga ia Tupai ma le faletua ia Gaufa.
E tolu ni vaega sa vaevaeina i ai le aulotu, o le vaega muamua o le autalavou, ua faaigoaina ia Apeteniko o loo taitai ai le susuga ia Mose ma Tepora. Vaega lua o tamā ma tina laiti, poo Mesako o loo vaaia lea e le susuga ia Poasa Faafou. Ma le ‘au a Sataraka poo mātua matutua e amata atu i le ta‘i 60 tausaga agai i luga, o loo taitai ai le susuga ia Loli ma Fuafiva.
Sa amata le faamoemoe i le sauniga e pei ona masani ai polokalame faapenei. O le faafeagaiga mai Samoa le susuga ia Solomona sa molimolia le upu a le Atua i loto ma agaga o lana fanau ma tapena ai mo le faigataulaga. Na saunoa le faafeagaiga ia Matafala Lesa, o le polokalame mulimuli lea o lenei tausaga ma lona naunautaiga ia faaolaola pea le gagana Samoa ma lana aganuu i totonu o aiga, ekalesia aemaise o lenei atunuu o loo tatou aumau ai.
O le susuga i le taitai ia Fesolai sa faia le upu e faafeiloai ai ekalesia ma le auvalaaulia.
O faamasino o le tauvaga o susuga i faafeagaiga ia Seloka, Esau faapea le susuga ia Kulesa. E fā ni vaega autū sa togi agai i ai le tauvaga i lea aso. E ese mai ai i taaloga, ma le taulaga, ae muamua o le pese e fati faasamoa; lona lua o le siva faitaga e taga faasamoa lona faatinoina; tolu o le togiga; ma lona fā o le fuataimi.
O le ‘au a Sataraka sa manumalo i le Ipu o le pese ma taaloga faapea le taulaga, ae o Mesako sa sola ma le malo o le siva faitaga ma le togiga, a o Apeteniko na mauaina le ipu o le fuataimi. O le aotelega o lenei faamoemoe sa manumalo ai le au malosi a tina ma tamā matutua. O le isi vaega na faateia ai tagata, o le taulaga sa lafoina e vaega taitasi. O Sataraka e $18,345.00; Mesako e $12,409.00, ma le ‘au a Apeteniko e $7,040.00 ma maua ai le aofaiga e $37,544.00.
Sa faaleo le lagona faafetai o le susuga i le faafeagaiga ia Matafala i lana fanau faaleagaga i le galulue mo le Atua ma lona finagalo, ma na ia ta‘ua ai foi, “E lē o se mea faaleaogā lo tatou tautiga i le Atua ma lana galuega.”
Ua iai le faamoemoe mo le tausaga fou e toe faaauauina ai foi. Na faamae‘a le polokalame i le saunoaga a le Fofoga o le ekalesia le susuga ia Tamale Letoa e momoli ai le faafetai i le auvalaaulia sa auai ma ni meaalofa mo faamasino.
