Ua lē o toe po se lilo i le tulaga ua iai le faaiuga a le alii taalo, le alo o Samoa na avea nei ma tama taalo o le Taamilosaga Taitoafitu a le IRB na mae‘a atu nei, le susuga a Mikaele Pesamino.
E ui lava o se tala faanoanoa i le Iuni Lakapi a le atunuu ma lana Taitoafitu a o sauni atu i tapenaga o Taaloga o Malo o le Taupulega, le Commonwealth, ae ua lē toe mafai se isi faiga ua mae‘a ona saini pepa o le Konekarate.
I se faatalanoaga ma le alii taalo na ia faailoa ai le ‘au lea ua saini atu i ai, o se tasi o Kalapu i Peretania le Sales Sharks i le aai tele o Manchester mo le lua tausaga. Sa fesiligia le tulaga o aiaiga o lana Konekarate pe faamata e mafai ona faamatuu mai le alii ia Oketopa i taaloga o le Commonwealth lea o le a faia i New Delhi i Initia.
O le tali mai a Mikaele e mafai, peitai e lei faamaonia maia lea tulaga.
E manatu eseese lava foi le atunuu e fiafia tele e maimoa ma tulimatai le taalo a Pesamino, aemaise pe a faaloaloa mai aao uumi o le alii taalo pea tamoe ma le polo, ona o lana faaiuga ua fai nei.
O le toatele foi o loo fesiligia pe aisea ua faatopetope ai lea filifiliga a le alii taalo, ae lē se‘i mae‘a lelei Oketopa, ona ua na o Pesamino le igoa o loo toe fia maimoa i ai le lalolagi o lakapi i lea taamilosaga tāua tele. E lē gata i lea, i le Ipu o le Lalolagi lea o le a faia i Nui Sila nei, ina ne‘i lē avanoa pe faamanu‘alia mai le alii a o feagai ma ana taaloga o le a alo atu i ai.
Sa faailoa foi e le alii taalo, e lē tasi se Konekarate na fai ai ana filifiliga. Sa iai foi sona avanoa e vaavaai ai mo nisi o ‘au e lua o le Super 15 i le tausaga fou i Ausetalia, le Brumbies ma le Melbourne Rebels, faapea ai ma le ‘au a le Toulon i Farani.
Peitai ua malo ia te ia le ono fuainumera lea ua faalala mai e le Sales Sharks, le ‘au foi lea o loo iai ma nisi tama o le Manu Samoa, le alii kapeteni ia Mahonri Swalger ma Paul Williams.
O loo i Niu Sila i le taimi nei le alii o Pesamino e talia ai lona malaga atu i Peretania, ae e momoli faamanuiaga ma alofaaga mo lona faamoemoe i lana Konekarate fou, e ui lava na maua ni lipoti salatua, le lei iai o se taimi e fautuaina ai e le Pulega a le Manu Samoa, ma sei tagatagai faatasi i le taimi o le sainiina o le Konekarate, ae talosia ia ao le manuia lea mo le lumanai o Mikaele, ae aua ne‘i fosiina e nisi pe aliae ai ma ni faiga faapolokiki, e taofia ai le alo o Samoa logologoa i le saoasaoa, ae saili ai ma ni seleni a nisi. Ia sagai ane ai o le Tai i le taumafai Pesamino!
