Ua salalau solo faamatalaga i le ave ai o le faamavaega a le Afioga Misa Telefoni, i lona itumalo o Falelatai ma Samatau, i le faamoemoe e lē toe tauva mai ai i le palota tele o le tausaga fou 2011.
Na faaalia e se molimau faatuatuaina, o le Aso Toonai, 18 o Setema 2010 na taunuu ai le faamavaega tusitusia a le afioga i le Laau-na-Fausia i se tasi o le faaaloaloga a le aiga Tauaana.
E lei mafai ona maua se faamaoniga o lea molimau peitai sa tuusa‘o loa se fesili tusitusia i le Afioga Misa Telefoni o loo seei i le tofi faipule o le itumalo i sona finagalo.
“O faavae o le Aiga Tauaana mo soo se mataupu e fitoitonu i Aiga, e lē tala i tua vaganā ua finagalo i ai faaaloaloga. E lē sa‘o lau mau i le faauigaina o la‘u feau. O la‘u feau afai e te finagalo e avatu sa‘u ‘comment’ – ta‘u mai lau ‘source’. Ou te lē tali atu i ni tala salatua.
O la‘u tali tuusa‘o i lau mataupu e ‘no comment’.” O se vaega lea o le finagalo o Misa ina ua ave i ai se imeli i le Aso Lua, 21 o Setema 2010, ina ua mae‘a ona ou oo i ai i lona ofisa i le taeao o le Aso Gafua, 20 o Setema 2010, ae sa faamalie ane lana failautusi o loo pisi e lē maua se avanoa, ae faailoa atu ia te ia (failautusi) la‘u mataupu.
Sa faia pea sailiiliga mo le fia maua o se mau maumaututū, peitai e oo lava i nisi o matai o Matautu Falelatai na fesiligia, sa lē finagalo e faailoa mai ni o latou taofi i le auga ma le autū o le fesili fia iloa a le tusitala.
Na ta‘ua e se isi molimau, e toalua nisi o sui o loo faamoemoe e tauva mai le itumalo o Falelatai ma Samatau i le palota o le tausaga fou.
O sui ia e toalua e aofia ai se tasi sa tauva muamua ma le afioga i le Laau-na-Fausia, faapea se sui fou o loo galue nei i le Iunivesite Aoao a Samoa.
O le Aso Toonai na tea nei e pei ona faaalia e se molimau e lei faamaonia, na fono ai le itumalo ma o loo iai le talitonuga o le fono lea e talanoaina ai le faamavaega ua oo atu a le Afioga Misa Telefoni mai le tofi faipule o Falelatai ma Samatau.
Ta‘ua foi e le molimau o le a fetuunai ai i lea fono se sui tauva mo le itumalo, lea e faapea mai o Siufaga ua tatau ona oo i ai le faasologa. O le a tulitatao pea e le tusitala lenei mataupu ona e matuā telē le silafia iai e le atunuu.
