Ua faamuta moemitiga ma se lumanai pupula sa tulituli matāgau e se tasi o alo o Samoa, le alii taalo lakapi o Ben Leia, ae ua taatia ai nei i le lāolāo le lumanai o sia alii talavou.
O Ben o se tama na amata ona a‘ea‘e mai le iloga o lana taalo mo le kalapu lakapi a le Malisi i Samoa, ma na iai i se tulaga ua lē o toe mamao ese sona avanoa mo le ‘au tele a le atunuu, le Manu Samoa.
Peitai o le masina o Ianuari i le tausaga nei, na lavea ai Ben i taimi o toleniga a lana ‘au, a o sauni le Malisi mo se latou malaga taamilo i Niu Sila. O manu‘aga tuga i lona ua se‘i tulou, ua taatia ai nei Ben ua pē le tele o vaega o lona tino, e amata mai lona fatafata agai i lalo; ua toe o lona ua ma lona ulu o loo mafai ona fegaioia‘i.
Ae pagā lea, e lē o iai i le Matagaluega a le Soifua Maloloina a le Malo Samoa se auaunaga faapitoa e tausia ai nisi ua iai nei aafiaga. O le isi itu sili ona faanoanoa, e lē o iai foi se polokalame a le Iuni Lakapi a Samoa mo se seleni o faataatia ese mo nei alo o le atunuu o loo avea ma avefu‘a a Samoa i le lalolagi i le itu tau taaloga, pe a oo ina lavevea ma aafia i ni manu‘aga tugā e pei ona iai nei Ben Leia.
E lē o mafai ona faatino se taotoga o Ben i le taimi nei, aemaise le faigata o seleni manaomia e auina ai Ben mo ni togafitiga i atunuu i fafo. O lea ua saili mai ai le alii faiaoga o le ‘au a Malisi, le susuga Brian Lima, i nisi o faalapotopotoga, kamupani aemaise nisi uso taaalo ma le loaloa o Samoa i Niu Sila, mo le faamaopoopoina o se seleni poo nisi foi mea e mafai ona fesoasoani i le tausia o lenei alo o le atunuu.
O le ogaoga o manu‘aga ua aafia ai le tino o Ben, e moomia ai se moega faapitoa ma se wheelchair e faataoto lelei ai i lona aiga. E ausage le tulaga tau seleni i le aiga o le taulealea, ma i le taimi nei o loo galulue tauofo le alii pule e faaulu i ai galuega a le Habitat NZ i Samoa, Max Diffey ma lana ‘aufaufale, e toe sosoo ma toe faaleleia nisi vaega o le fale o le aiga o Ben, ina ia faafaigofie mo le toe foi atu i ai o le atalii. Ae na ta‘ua e Mr Diffey, e tele nisi mea e moomia ona faatau atu e faamae‘a ai le galuega, peitai e tuta‘ia lava i le seleni.
Ua talia lelei e nisi o kamupani aemaise nisi alii iloga i le lakapi i Niu Sila lenei faatalauula mai a le alii faiaoga ma le kalapu a le Malisi Samoa, ma ua faatulaga ai se taumafataga e saili seleni ai. O le a faia foi se faatautu‘i poo se faatau faatauofoga, lea ua saunia faapitoa e le kamupani a le Orbit Corporate Travel ma le HOT Rugby.
O le faamoemoe i le afiafi o le Aso Faraile, aso 13 o Aukuso, ina ia aoina se aofaiga tupe e $75 afe pe sili atu, ina ia faatupe uma mea o moomia mo le faaleleia o lo latou fale o le a taoto ai, ma faataatia ese se isi vaega tupe mo ona togafitiga o le a faasolosolo ona faatino.
Ua faailoa e le alii kapeteni o le All Blacks, Richie McCaw ma nisi tama o le ‘au, o le a sauni e fesoasoani i lenei sailiga tupe mo Ben Leia.
O le a tuuina mai e nei alii taaalo nisi o a latou mea totino e fai i ai le faatautu‘i . O Richie McCaw o le a avea ma failauga faapitoa i lea afiafi, e faaleo ni ona manatu i le mataupu o le avea o se ta‘ita‘i (Insights into Leadership).
