O se tala fiafia i le Lakapi a le atunuu o Iapani lo latou manumalo i le taimi muamua i le au a le atunuu le Manu Samoa i Apia, ae o se manumalo muamua foi lea a Iapani i se ‘au mai le Pasefika talu mai le 1999.
Ai o le mea lea e ta‘u o le alu atu lava le moa folau vivini i laufanua ese.
Na amata tau ‘ai lava Iapani ina ua sala le Manu Samoa ma maua ai a latou ‘ai e 3 i le leai, peitai na sosoo sala na ova e lua a le alii o Lolo Lui ma sili ai le Manu e 6-3.
Ae na matuā faateia le au maimoa a Samoa ina ua sao atu le numera 13 a Iapani le alii Niu Sila o Nicholas ma faasasa‘o i lalo o le pou, ma ova le kiki toe faaopoopo ‘ai o Iapani i le 10-6. Na faaauau pea le faaletonu o le puipui a Samoa ma toe maua ai isi ‘ai a Iapani lea na ta ai le ‘afa o le taaloga ua 25 a o tumau pea le Manu i le na o le 6.
E ui lava ina malosi le toe foi mai a le Manu i le ‘afa lona lua ma maua ai sikoa e tolu mai le numera 8 o George Stowers ma le lua a le alii o Mikaele Pesamino, ae ua leai lava se avanoa e toe tuua ai e Iapani. E lua sikoa a Iapani ae tolu le Manu Samoa peitai o le sa‘o lelei o le vae o le numera 10 le isi foi alii Niu Sila o Jamea Arlidge, e aofia ai ma lana kolopu i le pou lea na atili tele ai o latou ‘ai.
Ua fiu lava si Manu e toe au tapili atu ona apaau malolosi ae ua leai lava ua fai foi si lelei ma vavave o vae o le au karate a Iapani.
O ‘ai o le taaloga Manu Samoa 23, Iapani 31. Na saunoa le susuga i le faiaoga, John Kirwan o se tasi o faamatua i le taaloga lakapi, e na te viia le taaalo ma le loto tetele o lana ‘au lea ua manuia ai le taaloga. Fai mai le Faiaoga, sa lē lelei le taaloga muamua a lana ‘au lea na faiaina ai i le taaloga muamua ma Fiti, ae o le malo ia Samoa ua avea ma tulaga e finau ai pea mo le siamupini o le Taamilosaga le Pacific Nation Cup a o totoe le vaiaso e tasi.
O Iapani o le Siamupini lea o le Taamilosaga o le Asian Five Nations. O le isi taaloga o le Taamilosaga i le faaiuga o le vaiaso na faiaina ai foi Fiti ia Tonga.
