Ua nofo sauni alii ma tamaitai taaalo e iai manaoga faapitoa sa tausinio i se tauvaga o taaloga faavaomalo i Ausetalia talu ai nei, e talia ni faailoga o le faailogaina o le Iupeli Taimane poo le Diamond Jubilee o le nofoaiga a le tupu tamaitai o Peretania o Elisapeta II.
O le vaiaso fou e tauaao atu ai ia faailoga e le hai-Komesina o Peretania mo Samoa pe a asiasi mai i le atunuu.
O le a maua foi e tina faipisinisi o le atunuu ia faailoga e aloaia ai a latou taumafaiga tau atina‘e e pei ona faatau atu le suauu popo a tina faipisinisi o Samoa i faleoloa o le Body Shop i Peretania mo le gaosia ai o fagu manogi ma isi oloa e faamomosi ai tino ma foliga o tamaitai e faatumau ai lo latou lalelei.
O le faauluuluga o le aoga o le Senese e faapitoa mo fanau e iai manaoga faapitoa le faletua o Donna Lene o le a tauaao i ai le faailoga ma le siakitupe e afe lima selau pauni Peretania, faapea le faletua o Adi Tafunai o le Women’s in Business.
