Na ligoligoa le vaega e faatalitali ai pasese i le malaevaalele o Brisbane i le po o le Aso Toonai, 19 o Aperila a o lealea atu le siufofoga ole alii pese lauiloa o Samoa, le susuga ia Seiuli Pesa Ilimaleota i se pese na ia fatuina mo Alex.
E maeu le taleni a lenei foi alo o le atunuu auā na vaaia le toetoe a tutulu Alex i le manaia o upu o le pese ma le fatuina o le vii. E lē gata ia Alex ae faapea nai ona mātua ia Faatau‘i ma Leitu faapea le toatele o le aiga sa auai.
Na mafai foi ona auai atu le afioga i le taitaifono o le ekalesia LMS Pasefika, le afioga ia Afoa Alapati ma le faletua ia Sarai Meatuai Tuuga, Faatui Leati ma le faletua faapea le pule sili o le Uncle Sam ia Poulava Matautia ma nisi sa mafuta atu i lea afiafi.
Na vaaia lava le lototele o le alo o le atunuu ma lona naunau ia fai se ‘ai mo le tapuaiga a Samoa lea ua toe tasi le vaiaso ona alo lea e tau le taua i le Aso Sa o le vaiaso a sau. E tele kalapu ua ofoina mai mo le atunuu e fia maimoaina le fusuaga. Tatou manatua le susuga ia Alex ina ia a‘e manuia lona taumafai ma lona naunautai ia pale mai i le siamupini o le lalolagi i le faipele.
Tau ia ina ia a‘e manuia le alo atu o Alex mo lana taaloga lea ua iite fanua a lalo o le toe aso lenei nai Moamoa ua toe o se aga.
