L-R Hon Willie Jackson (Minister of Employment), Inspector Kay Lane, Michael Barnett (Auckland Business of Chamber CEO), Mark Goldsmith (MSD Auckland Regional Commissioner), Alf Filipaina, ma Detective Inspector Fata Willie Fanene faapea le mamalu o latou sa maua o latou laisene avetaavale

Na faatumulia le malumalu tapuai o le Ekalesia Faapotopotoga Kerisiano a Samoa le Puaseisei i Magele i le afiafi o le Aso Tofi, aso 30 o Ianuari 2020, i se sauniga faapitoa mo i latou uma lea ua mafai ona pasi ma mauaina o latou laisene avetaavale i Niu Sila. E 134 le aofaiga o i latou uma mai atunuu o Samoa ma Tonga sa mauaina o latou laisene avetaavale o le ituaiga o le Learners poo le laisene amata, Restricted poo le laisene e iai aiaiga, faapea ma le Full License poo laisene ua lelei atoatoa e aunoa ma ni tuutuuga.
O le susuga lava i le Faafeagaia o le EFKS a le Puaseisei ia Victor Pouesi sa taitaia se sauniga puupuu e amatalia ai lea faamoemoe ma faafetaia ai le alofa o le Atua ona ua taunuu ma le manuia le faamoemoe sa fau ao fau po. E lē gata i lea sa ia saunoa foi e faafetaia matagaluega uma ma i latou o e sa gapatia ma taumafai e tuufaatasi lenei faamoemoe matagofie ma faamamaavega i nai aiga.
O le susuga i le alii malu o le Malo ia Romeo Chungson o le matagaluega o leoleo i Niu Sila sa fai ma fofoga o le faamoemoe. Sa auai ai foi nisi o Faipule ma sui o le Palemene a Niu Sila faatasi ai ma nisi o sui o le Pasefika o loo seei i totonu o Boards a Aukilani i Saute faapea ai ma faauluuluga o nisi o Matagaluega ma Kamupani tetele i totonu o Niu Sila.
O le Afioga i le alii Minisita o Tagata Faigaluega Hon Willie Jackson na saunoa amata e faafetaia i latou uma sa maua ma pasi le sueina o laisene mai lava ia Novema 2019 na amataina ai seia oo mai i le aso mulimuli o Ianuari 2020. Sa ia faafetaia foi aiga ma Ekalesia ona o le latou lagolagosua aemaise o le tapuaiga lea ua manuia ai taumafaiga a i latou nei.
O le susuga i le tamaitai Inspector ia Kay Lane o le Matagaluega o Leoleo i le vaega o aualatele ma le saogalemu na saunoa lona lua i le faatāuaina o le fealuai taavale a’o iai se laisene, e lē gata o le puipuia mai ai i le tele o sala ae toe puipuia mai ai foi i le mamafa o le Tulafono pe a faapea e te aafia i se faalavelave ae sue atu e leai sou laisene. Na faamamafa foi e le tamaitai Inspector le faamalosia o le aua le faaaogāina lau telefoni a’o ave le taavale ma le tele lava o fautuaga mo le avea ai o oe ma avetaavale saogalemu i luga o aualatele i soo se taimi.
O nisi sa saunoa i lea afiafi e aofia ai Mark Goldsmith o ia o le MSD Auckland Regional Commissioner, Michael Barnett o ia o le Auckland Business Chamber CEO ma le susuga i le Faafeagaiga ia Victor Pouesi o le sui o Mafutaga a Ekalesia o le Pasefika i Aukilani Saute faatasi ai ma le Matagaluega o Leoleo ma Faamasinoga ma o i latou uma nei sa lagolagoina ma tuufaatasia lea polokalame matagofie.
O le susuga i le A’oa’o ia Pagamalie Iopu Faivalu sa fai ma sui o i latou uma sa mauaina laisene e faafetaia le polokalame ua mafai ai ona toe maua e ia le avanoa ma le fesoasoani lea ua uu ai lona laisene avetaavale Niu Sila, e lē gata i lea a’o ia foi o se tasi o sui aupito i matua o le polokalame, ua 63 nei tausaga o lona soifua ma ua leva foi tausaga talu ona taunuu mai ma aumau i Niu Sila a’o lenei faatoa fai sona laisene avetaavale. Na ta’ua foi e Pagamalie Iopu Fa’ivalu sa ia tusia foi se pese i ni tausaga ua tea e faatatau i le avetaavale faautauta ma saogalemu i luga o auatele peitai o le asō lea faatoa ia iloa ai le tāua o lea pese.
O le susuga ia Iopu Fa’ivalu o se tamalii ua
iloga sona sao i le musika ma ua lauiloa foi i lana taleni pese aemaise lava o si ona leo faatagitagi maualuga toe faamomoiloto upu o ana fatuga e moomia pea e le tele o tamaitai e oo mai lava i nei ona po i le au faili ta’uta’ua a Tama o le Tiamaa mai Toamua.
I le saunoaga faaiu a le Susuga i le Faafeagaiga ia Victor Pouesi, sa ia faafetaia ai le Afioga i le Minisita o Tagata Faigaluega Willie Jackson ma malo faaaloalogia uma sa auai, ona o le latou agaga fiafia e lagolagoina polokalame ma fuafuaga a le malo mo tagata Pasefika i taimi uma.
Na taualuga le saunoaga a le Faafeagaiga i lona faafetaia faapitoa o le susuga i le alii ofisa malu o le malo ia Siki Ah-Shew, o ia o se alo Samoa o loo galue nei o se leoleo i Niu Sila, ma tautua ai o se sooupu mo tagata Pasefika i le Matagaluega o Leoleo ma Faamasinoga. O le alii ofisa ia Siki Ah-Shew, o ia sa feagai ma le faapolokalameina ma le tau tuufaatasia o lenei fuafuaga aemaise le va ma le atunuu ma Ekalesia ina ia lagolagoina ma iloa le tāua o lenei polokalame.
Na saunoa Siki o lenei polokalame sa faia fua uma e aunoa ma se totogi, e na’o lou resitara lava ma ia 16 tausaga agai i luga le matua pau lea o vaega moomia, ae faia fua uma a’oa’oga ma suega e oo lava i le totogiina o lou laisene pe a pasi. Na ia ta’ua foi e fesoasoani tele foi lea polokalama mo i latou e faigata ona malamalama i le gagana Peretania.
E 73 tausaga o si tamā pito i matua o le polokalame lea sa maua lona laisene ma o se lu’itau foi lea mo le toatele o loo faapalapala ma faifai upu solo ae leai ni laisene, e faatū se sini ina ia faia ni laisene avetaavale ma avea o ni tagata e tausia le Tulafono.