Poo lou tauto i le Tusi Paia i totonu o se faamasinoga ae lei faia lau faamatalaga, poo le faia o sau tautoga tusitusia ona e saini lea ma tauto i le Tusi Paia, e moni ma faamaoni au faamatalaga la e fai i luma o le faamasinoga, poo lau tautoga tusitusia, e te falepuipui pe a molia oe i le tulafono ae maua ane, sa e tauto pepelo.
O le uiga tonu o le upu “Perjury”:
O le uiga o le upu faapapalagi o le Perjury, o se faamatalaga a se tagata o faia se tautoga i luga o le tulafono, o lea faamatalaga o loo fai ma le iloa e le tagata e ona le tautoga e sese ma pepelo le tala la e fai, ae fai lava ina ia faasese ai se faamasinoga, poo se suesuega e fai i luga o le tulafono.
O Faasalaga nei e oo i ai le Tagata Tauto Pepelo:
I le Vaega 109 (Section 109 of the Crimes Act):
(1) … o tagata uma e molia i le tauto pepelo e falepuipui i tausaga e lē sili atu i le fitu (7) tausaga.
(2)…. Afai e tauto pepelo se isi, e mafua mai i le manao o le tagata lea e tauto pepelo, e faaaogā lana tautoga, e faafalepuipui sese ai se isi, e falepuipui le tagata lea ua tauto pepelo i le va o tausaga e 3 ma le 14 tausaga.
Le ala ua Tāua ai lenei Vaega o le Tulafono:
O se mataupu na tulai mai e uiga i se tamaitiiti na faatea mai i Samoa. O le tala a le tina lea e talosaga e faateaina le tamaititi fai mai, o le tamaitiiti e leai se pepa fanau, ae ua manao vave e fai le liliuga o le tamaitiiti ona ua manao e faaaoga i Niu Sila.
A o faatali le pepa fanau na talosagaina mai i Samoa, sa faalagolago le loia i (1) faamatalaga a le tina lea e fia faateaina le tamaitiiti), (2) faamatalaga a le tamā moni o le tamaitiiti (3) faamatalaga a le tina moni o le tamaitiiti.
O nei tagata uma e toatolu sa faia uma a latou tautoga i le Tusi Paia, fai mai o le tamaitiiti na fanau i Matootua Hospital. Manatua o tautoga o tautoga a tagata na iai i le taimi na fanau ai lenei tamaitiiti.
E aumai le pepa fanau mai i Samoa i le ofisa o lesitala ai aso fanau o tagata Samoa, fai mai le pepa fanau o le tamaitiiti na fanau i Siusega.
Sa fai le apalai e tusi ai Matootua, auā o le faamatalaga lena a le aiga. Ae fai le Order of Adoption ua tusi ai Siusega ona o le taimi lena ua maua mai le pepa fanau o tusi ai Siusega.
E avatu le Adoption Order e lesitala, ae tetee e le ofisa o lesitala i Samoa ona e fai mai e eseese ia tautoga na lagolago ai le talosaga, ese le nuu la ei luga o le pepa fanau o le tamaitiiti. Manatua o le pepa fanau o loo tusi ai o le tamaitiiti na fanau i Siusega.
E oo mai i le asō, o le pepa fanau fou o le tamaitiiti lea e ta‘ua, o loo tusi ai o le tamaitiiti na fanau i Siusega.
Ae maua mai le pepa mai i le falemai i Matototua, o lea pepa o loo iai le stamp a le Motootua Hospital, e fai mai o le tamaitiiti na fanau i Motootua, ae o le tina mo‘i o le tamaititi lea e ta‘ua i luga o pepa mai i Motootua, e ese le fafine, e lē o le fafine lea na faia le tautoga, fai mai o ia na fanau mai ai le tamaitiiti lea.
O loo ta‘ua mai o le tamaitiiti na fanau i le falemai i Motootua, ae o le igoa o le tina na fanau ai le tamaitiiti i le pepa lea na aumai i Matootua, o le tamaitai lea na apalai na te faateaina le tamaitiiti.
O le tamā mo‘i o le tamaitiiti o le tuagane mo‘i o le tamaitai Samoa lea na apalai e faate’a le tamaititi.
O pepelo nei o loo tumau i le faateaina o lenei tamaitiiti:
1. Afai e sa‘o tusitusiga a le falemai i Matootua o lona uiga o le tamaitiiti na fanau mai i le tuagane ma le tuafafine. Afai e sese le lipoti a le falemai a Matootua, aisea na mafua ai ona sese?
2. E faafefea ona tauto i le Tusi Paia fafine Samoa e toalua (le tina moni o le tamaitiiti) ma le (tina lea na apalai e faatea le tamaitiiti) ma se tamā Samoa (tamā moni o le tamaitiiti) fai mai o le tamaitiiti na fanau i Matootua, ae o lea ua latou taliaina se pepa fanau e fai mai o le tamaitiiti na fanau i Siusega?
O telē ia o le afaina o tagata na faia tautoga i lenei mataupu pe a oo i luma o leoleo, malo o Samoa ma le malo o Niu Sila. E toe faaauau atu laasaga e oo i ai lenei mataupu.
