O le a ou le toe asaasaina le filifili o le vaosa aua e ui lava ina tagutugutu ae ua iloa ala o tama. E uliuli foi le moana ae ua taoto ala o ia. O le mea lea Samoa i ou paia ma ou mamalu o le a le toe tāea lava i se faamatalaga, aua o sa lava ma faiga e tumau pea e le avea. Tulou, tulou, tulou, tulouna lava.
Ae avea ia o lenei avanoa taua ua mafai foi ona maua e toe faafeiloai atu ai i le mamalu o si o tatou atunuu, aemaise lava i latou o loo fiafia pea e faitau i le auaunaga ma le tautua atu a le Samoa Times i vaiaso uma. Faatalofa atu ia outou susuga i faafeagaiga o loo faatuna paulia ma faafale lemalu i soo se fata faitaulaga aua le tauasuina o le Ipuvai o le Ola, o le Talalelei ia Iesu Keriso ma Lana Faaolataga. Faatalofa atu foi i tuaa matutua, o tootoo uli ma tootoo sina o Samoa i soo se tafa o loo faapea ona au atu i ai le tautua le faatuaoia a le tatou nusipepa.
Faatalofa atu ia outou afioga i Tapaau ma Aiga, aemaise foi o Faleupolu tofia o si o tatou atunuu. Faatalofa atu i faletua ma tausi, o saoao ma saoaumaga seia oo lava i fanau. Faamalo le soifua manuia ma le lagi e mama. E iai lava le talitonuga o loo maualuga pea le alofa ma le tausiga faamaoni a lo tatou Alii i lo outou soifua faatupu ma so matou malosi.
O le mea lea e ao ai ina viia o Ia i mea uma tatou te faia, aua ua sili lava Lona lelei mo i tatou uma i soo se taimi ma soo se aso o lo tatou olaga.
Ua manatu i lenei vaiaso ina ia faasoa atu i se tasi o mataupu sa faapea ona ou faalogo i ai i luga o le televise i se tasi o po o le vaiaso na tuanai atu nei. Sa ou faalogologo ma le totoa i se tasi o polokalame sa faasalalau mai i luga o le Tagata Pasefika o faalauiloa mai ai se tasi o aiga e faapea ua mafatia ona ua ave uma tupe e fesoasoani ai i aiga mafatia i Samoa i le sunami, ae faaletonu ai latou. E le gata foi i lea ae o nisi o lipoti na aumai faapea ua iai foi aiga ua toe ave a latou taavale ona ua le lava le seleni e totogi ai.
Samoa le atunuu pele, e le fesiligia e le Tusitala le tulaga tausi aiga o si o tatou atunuu, aemaise ai lava le itu e pei ona afatia ai le faigamalaga a Samoa i galulolo i le masina na sei mavae atu nei. I lea la talitonuga, ou te le faamasinoina ai le soifua alofa faatino a si o tatou atunuu aua o le natura lena o tatou. O nisi foi o taimi e pei e manatu si o tatou atunuu o le mafuaaga lea na ala ai ona tatou malaga mai i nei atunuu ona o le alolofa lava i Samoa. E
tonu lava le tagata i lana faatatau ma lana faasoa. E tonu foi le tagata i ona lagona ma mafuaaga e ala ai ona foai. Ae o le manatu vaivai a le Tusitala, sei alolofa Samoa ia seu le manu ae tagai i le galu. O upu e masani ai i tatou i le gagana o aso faisoo e faapea, “E fai foi o lena a o lenei”.
E pei lava ona fai atu e le fesiligia le tulaga alolofa o si o tatou atunuu. Ae o le fesili, o talafeagai ma le tamaoaiga ua faamanuia mai ai le Atua i lou aiga i lea vaiaso ma lea vaiaso. E lelei le tuutuu i le loloto o le tofa ma le faautautaga, aua e tatou te le fia faalogo atu ua ola faalolo aiga i Niu Sila nei talu ai le alofa faatino mo Samoa. E moni lava i le valevale alofa i aiga pele o loo ua tagi mai nuu ma mafatia ona o galulolo, ae o lea lava o loo iai le alofa solo atu a atunuu e mamao ma faalapotopotoga e pei o le Koluse Mumu ma isi. O nei meaalofa solo atu o loo faatofutofusia ai aiga taitasi, atoa ai ma le fesoasoani faifaipea a si o tatou Malo o loo tuuina atu i aiga.
I le taimi nei o loo faapea ona sologa manuia aiga i Samoa e tusa ai ma faamanuiaga mai le Atua, e ala lea i le foai ma le agalelei sasaa atu a isi foi atunuu. O le mea lea e aua ai le soona faapopoleina tatou Samoa.
O lea ua tatou faalogo i le fesoasoani tau tupe mai le Malo aua le toe fausiaina o fale mo aiga ua faaleagaina, o se faamoemoe lelei lea e tau ina toa ma mapu i ai aiga, ona faufau malie lea o le tofa aua le toe faafoi mai o fale lelei e pei ona sa iai a o lei tafia i le malolosi o peau ma galu fafati.
E lagona le alofa ona o le naunau ma le tiga alofa o nai aiga aua Samoa ma i latou o loo mafatia. Ae o le fautuaga, toe tagai lava i lau faatatau. Aua foi nei avea le valevale alofa le tofa tatala ma le faautautaga sasaa mai le Atua, aua o vaega taua ia e fua i ai lo tatou galulue i aso ma vaitau faapenei.
E iai le manatu a lelei ma mautu nai o tatou aiga iinei o le a faigofie ona fai se isi fuafuaga aua le toe faaleleia atili o aiga i Samoa. Ae a faaletonu i tatou, o lona uiga foi o le a faigata ona ave se fesoasoani mo nai o tatou aiga o loo tagi mai ala. O le upu masani a le atunuu, e le aoaia e Laupua Tamafaiga.
O se lagona lea Samoa, ua na o se tagi lava a le pumate ina ia toe sasaa le fafao. Tilotilo muamua i lou lotoifale ma fausia ina ia mauaa, ona matua to lea o le alofa aua aiga o i Samoa. O le a se mea ua e maua i lenei taimi e faatino ai le foai ma le agaga fesoasoani aua aiga, ia faia ma le loto fiafia ma le saolotoga e manuia ai tagata uma, ae aua lava nei valetuulima le faatatau.
Ia manuia lenei vaiaso ma galuega o loo feagai ai, ae tatou te feiloai pea.
Soifua
