Peni a le Tusitala 6 Iulai 09

E faatalofa atu Samoa le atunuu pele i lenei foi vaiaso fou. O paia ma mamalu o si o tatou atunuu o le a le toe oo iai se tusitusiga.
E iai le talitonuga e leai se poto e nate toe faaopoopo pe toe toese se iota o Sa ma Faiga o Samoa, mai a i le vavau se ia oo i le faavavau. Atonu ua le o toe po se lilo i le mamalu o le aufaitau le tulaga e pei ona faalauiloa atu ai ni isi o suiga o le a iai foi se vaaiga i le tatou pepa.
O ni isi o ia suiga e aofia ai le suia lea o le lanu e pei ona masani ai le itulau muamua atoa ai ma ni isi o itulau o loo i le pito i totonu.
O ni isi o suiga ua taumafai ai le pulega ina ia siitia le fuainumera o tala lipotia mai Samoa, aemaise o le lipotia lea o le tele o tala i mea moni o loo tutupu i lea vaiaso ma lea vaiaso, ae e leo mafai ona iloa atu e le mamalu osi o tatou atunuu o loo afifio ma papaaao i fafo mai o Samoa. I lea lava suiga, ua faaopoopo ai ma le fuainumera o i latou o loo tusitusi ma aumaia tala mai lo tatou atunuu i vaiaso taitasi.
O le a faapea foi ona iai ni isi o tusitusiga fou ma o le a faaauau pea i vaiaso uma e pei o le Aganuu, Polokalame faapitoa mo le aoaoina o le Gagana Samoa, E te Silafia, ma isi.
O se tasi lenei o itulau ua faaopopo i le suiga o le tatou pepa, o le a mafai ona e faitau ai ise finagalo o le Samoa Times i ni isi o mataupu ogaoga e aafia ai le soifua manuia o nai o tatou tagata e le gata i Samoa, ae faapea foi i le lalolagi atoa.
O lenei tusitusiga o le a lomia lea i le itulau e lua, ma le faamoemoe o le a fai ma faamalosiau, luitau, atoa ai ma le fesoasoani i motugaafa ma motugamanatu e faatupu atili ai le silafia o tatou tagata i vaega e manuia ai.
O le faanaunautaiga i le pulega ma le aufaigaluega a le Samoa Times, ina ia faamalieina lau faitau i tusitusiga ma lipoti o loo lomia i totonu o le tatou nusipepa.
I lea tulaga o le a mafai ai lava ona faatumauina le sootaga ma le mafutaga vavalalata a le Samoa Times ma le mamalu o le aufaitau, aua o le a o matou taumafai pea e tausi le matou manulauti, o le ofoina atu lea ose auaunaga pito sili ona lelei e ala lea i le lipotia o mea na tutupu, o loo tutupu ma o le a tutupu foi, i se tautua le faapaole ma le le faatuaoia.
Mo le silafia e le mamalu osi o tatou atunuu, o le masina lenei ua atoa iai le fitu o tausaga talu ona amatalia le auaunaga a le Samoa Times.
O le faapogai lea o le iai o ni isi o suiga ina ia le tumau ai la matou tautua ise vaega, ae ia siitia pea i lea tausaga ma lea tausaga, aua o le ute lea o le auaunaga o le fai o suiga ina ia saga faaleleia atili ai la matou pito laau.
O le a iai nisi o vaega taua o loo tapena iai le pulega aua le faailogaina o le fitu tausaga o le tatou nusipepa.
O ni isi o ia vaega taua e aofia ai faamanuiaga ua fuafuaina ma o le a faalauiloa atu pea i lenei masina.
E pei ona silafia, e le o misi lava se tausaga ma faamanuiaga mai le Samoa Times e ofoina atu ma le manatu maualuga, o se taumafaiga lava ina ia toe taui atu la outou lagolago mai e ala lea i le faatauina ma le avea pea o le Samoa Times ma paaga masani ia te oe i vaiaso taitasi.
Ua faaopopo i lenei suiga le toe faaleleia atili lea o le Upega Tafailagi a le Samoa Times, ma o le a mafai ona e faitau ai i tala fou ma mea o loo tutupu i lo tatou siosiomaga Samoa i soo se taimi i aso taitasi e asia ai lea foi tautua e ala lea i le tuatusi faaupgea tafailagi o le www.samoatimes.co.nz.
Samoa e le atunuu pele, e avea ai lenei avanoa taua e faailoa ma saga momoli atu ai le agaga faafetai a le Pulega ma le Aufaigaluega a le Samoa Times i lo outou paia ma lo outou mamalu ona o le tou lagolago mai. Faafetai mo le faatauina o le tatou nusipepa, aemaise ai o lou faatuatuaina lea o le Samoa Times o le nusipepa e malie ai lou finagalo e ala i lau faitau. O le a ea sa matou tala pe ana le tuu mai lou aao ma tausoa faatasi la tatou galuega. Ia saga faamanuia tele atu le Atua e ala i le talia lelei mai o le matou tautua atu.
O le a faauma se lagona o lenei vaiaso i le matou faapea atu, afai o le a sa matou auaunaga i lena fitu tausaga ma so matou faaletonu, ia alofagia faamagalo mai le pulega ma le aufaigaluega. Afai foi e fia faaalia sou finagalo i luga o le tatou nusipepa i soo se vaiaso, o le a avanoa pea la tatou auaunaga mo lea tulaga i luga o le upega tafailagi.
E le gata i lea, ae o le a avanoa foi le itulau masani o le Tusi i le Faatonu e faailoa ai soo se vaega ete fia faasoa mai ai.
E fautuaina foi le paia i Ekalesia ma Faalapotopotoga ina ia faaaogaina la tatou auaunaga e faailoa ai vaega o loo tutupu i totonu o Aulotu ma e taliaina foi le tusia mai o tala i mea na tutupu atoa ai ma ata e tuuina mai mo le lomiaina.
Ae tuu maia lou aao Samoa sei o tatou lululima ma patipatia le alofa ma le agalelei o le Atua, ua mafai ai ona aulia mai ma le manuia le fitu lenei o tausaga o la matou auaunaga.
See maia i ou seetaga malu, ae o le a o matou alo atu i la matou tautua masani ina ia faamalieina lau faitau, ae sili ai ia maua se viiga o le Atua i mea uma tatou te faia.
Ia manuia lava lenei vaiaso ma galuega o le a feagai ai, ma le faamoemoe o le a tatou toe feiloai i le vaiaso fou i le soifua manuia ma so matou ola mai le Alii.