E fiafia lava e toe faatalofa atu i le paia maualuga o si o tatou atunuu i lenei foi vaiaso.
E le gata i lea ae o le mamalu lasilasi o le aufaitau o loo faapea ona fiafia pea e talia mai le tautua atu a le tatou nusipepa o le Samoa Times i lea vaiaso ma lea vaiaso.
E faafetai atu foi ia te i latou o loo mafai ona faaaogaina mai le upega tafailagi a le tatou nusipepa www.samoatimes.co.nz mo le faaooina mai o latou finagalo e tusa ai ma ni fautuaga, a o se latou foi maitau mai i vaega o loo fiafia i ai e ala i le tautua atu.
E le gata foi i lea ae o i latou o loo valaau mai i le tatou telefoni ma faasoa mai.
O isi foi e na ona valaau mai ma faailoa mai le latou faamalo ma le agaga faafetai i sa matou auaunaga.
A mea o le sae lea o faigamea, o le iloa o loo aoga se matou galuega e ala i tusitusiga ma le lipotia o tala i ni faamoemoega na tutupu e le gata i nai o tatou tagata Samoa, ae faapea foi ma isi atunuu, ma nai o tatou motu tu tuaoi. I le ma lea, o lo matou iloaina o loo tatou galulue faatasi i le faatinoina o la matou auaunaga.
O le a ea sa matou upu e fai atu, ua na o lea, ia saga faamanuia tele atu le Atua i la outou lagolago mai. Faafetai, faafetai, faafetai.
O le vaiaso nei o loo faapea ona faaauau atu ai le tatou faalauiloa i nisi o faamanuiaga mo le Aso Sa o Tama.
O lenei faalauiloa o loo faapea ona avatu ai le avanoa e manumalo ai tama i nisi o se‘i ua saunia ma tapenaina faapitoa e le pulega ma le aufaigaluega a le Samoa Times mo nai tama ma lo latou aso.
O le faamalosi mo i tatou aemaise lava o tina, ia aua nei misia lenei avanoa taua. O se avanoa e le toe foi mai pe afai o le a le faatauaina.
O le faailoga muamua o le a mafai ona manumalo ai i se pepa malaga e malaga ai tamā i Samoa i le vaalele a le Air New Zealand ma toe foi mai.
I lea lava malaga, o le a mafai ona maua ai ma se avanoa e nofo fua ai i le hotel o le Insel Ferman i le afioaga o Tanugamanono i po e tolu.
O le a se taua o lenei faamanuiaga muamua ma le avanoa ua maua? Pule oe ma le tali e te taliina ai le fesili lena.
Ae i le manatu o le Tusitala, e le maua uma e ni tamā se avanoa e malaga fua ai i Samoa, ma nofo fua i se hotel. Aisea la o le a misi ai lenei faamanuiaga? O isi faamanuiaga o loo mulimuli mai, o se‘i e faapea ona manumalo ai i nisi o faailoga ua saunia lelei aua lava le saga faatauaina o le Aso Sa o nai tamā.
Samoa, e na o le pau lava le galuega e te faia o le faatumu lea o le pepa o loo lomia i totonu o le Samoa Times ma toe faafoi mai. Tusi i ai le suafa o le tamā o le aiga, o le tuatusi, ona tuu lea i ai ma se ata lelei o le tamā atoa ai ma le tolusefulu tala, ona toe faafoi mai lea i le Samoa Times.
E na o le pau a lea. Ae mafai e lena tolusefulu tala ona ave le tamā i Samoa ma faanofo i le hotel ma toe aumai i Niu Sila nei, i le auaunaga a le Air New Zealand, ae o nei manuia uma, o loo faatupeina e le Samoa Times.
O lona uiga tina, alofagia aua nei misia lenei avanoa, ma sei vaai i nei tei ua faatuai ona le maua lea o se avanoa e tuu ai le suafa o le tama i totonu o le se‘i aua nei faamanuiaga.
Ua le o toe po se lilo i le mamalu o si o tatou atunuu aemaise lava o le au faitau le tele o suiga ua taumafai le Samoa Times e faalauiloa atu.
Talu mai le masina o Iulai sa toe siitia ai i luga le faaleleia atili o le auaunaga ma le tautua atu a le tatou nusipepa, ona o le manatu lava ina ia tulituli lana manulauti, o le saunia lea o se nusipepa e faamalieina ai le faitau, ma le faalauiloaina lea o mea o loo tutupu i se vave e mafai ai, ma le sailiina lea o le mea moni aua le lipotia i vaiaso taitasi.
O nisi o nei suiga o lena ua iai le tatou Fagogo, ua iai ma le tatou itulau o loo lomia ai le Solo ma Tauloto, o le itulau mo le lomiaina o taumafaiga e ala i le faaeaina i aoaoga, o galuega, taaloga ma soo se vaega e faamanuiaina ai alo ma fanau, aemaise tamalii o Samoa.
Talu mai foi le masina o Iulai, o loo tumau pea le tautua atu a le Samoa Times e ala i le auina atu o tala i mea o loo tutupu i Samoa, ma le faalauiloaina atu o ata i vaega uma o loo lipotia atu.
E oo mai i le taimi nei, o loo galulue pea le tatou pulega ma le aufaigaluega ina ia saga faaleleia atili ma ia faatumauina lea tulaga lelei ma le maualuga o le auaunaga.
Talu ai ona o le agaga maualuga ina ia faatumauina nei suiga, ua ae ai se manatu i le pulega ma le aufaigaluega, o le a amata atu i le lomiga o le vaiaso lona lua o Setema ona siitia le tau o le tatou nusipepa i le tolu tala ($3.00).
O lea siitaga o le a fesoasoani lea mo le faataunuuina o lenei lava moemitiga, ina ia tausisia ai pea le tatou manulauti, o le iai lea o se nusipepa e malie ai lou finagalo ma lau faitau, e pei o le Samoa Times.
Ia manuia tele galuega o le a feagai ai ma si o tatou atunuu i lenei vaiaso. Ia to faaua ifo faamanuiaga a le tatou Alii i le fetaalolo ai o si o tatou atunuu i galuega faatino ma ni a tatou auaunaga fai, ae ia sili ai ona maualuga ma tumau atu ia te Ia o Lona lava viiga e faavavau.
Soifua ma ia manuia
