Peni a le Tusitala 3 Aukuso 09

Si ou alofa talofa lava Samoa i lau faitau i lenei foi vaiaso. Faamalo atu le soifua manuia ma le lagi e mama aemaise o le tauatai i tiute ma galuega o loo feagai ai. Faatalofa atu i tama ma tina matutua o si o tatou atunuu, o e o loo faia pea le faiva o le fatu aiga, aemaise o le taputapuaia o faiva alofilima o loo fitaituga ai Samoa i soo se ituaiga o matafaioi ua valaauina e le Atua le soifua galue ma le ola tauivi e auauna ai.
E fiafia foi e faatalofa atu i susuga i faafeagaiga o loo faatuna paulia ma faafale lemalu i soo se vaega o loo faapea ona talafaauto ai le finagalo o le Alii.
Ae sili le faatalofa i paaga masani a le Samoa Times o loo taliaina pea le tautua atu i lea vaiaso ma lea vaiaso.
E maualuga le talitonuga o la outou lagolago mai e ala lea i le faatauina o le tatou pepa, o loo fai lea ma faamama avega i le matou foi pitolaau o loo taumafai atu.
O lenei vaiaso ua manatu le Tusitala ina ia faasoa atu i le tulaga e pei ona iai nei le tulafono e uiga i le sasaina o fanau.
O lenei lava tulafono ua fai lea ma ponatia i finagalo ma mafaufau o le toatele o le mamalu o le atunuu, aemaise lava i latou o loo faia pea le latou tiute e ala i le sasa mo le faatonuina, ae le o le sasa ina ia faamanuaina e pei ona iai ni isi o faalavelave e pei ona sa tulai mai i ni isi o tausaga ua tuanai atu.
O le manatu o nisi, e pei lava ua aia tele le Malo i le aiatatau na tuuina mai e le Atua i matua ina ia aoaoina ai a latou fanau. E moni lava o loo fai le latou foi tiute ina ia mautinoa o loo saogalemu fanau, ae o lea lava ua sosopo tuaoi ma le tulaga sa tatau ona iai.
E le o toe po se lilo o lea ua faamasino leoleo i le ituaiga o matuia e faaono molia ai se matua e na te sasaina se tasi o lana fanau. O le uiga o lea tala, e fuafua le moliaina o le tama poo le tina i le vaai a le leoleo.
Fai ma faataitaiga pe a silasila atu le leoleo ua pata le lima pe pata foi le alafau o le tamaititi, ua lava a lena e molia ai oe ina ia e tulai i luma o le faamasinoga e tali atu i moliaga o le sauaina o fanau.
Ae poo le a lava le ituaiga sasa, o le mimilo o le taliga sei tulou le mamalu o le aufaitau, o le kuma o le ulu, o le uga o le auvae pe o le futi foi o le ulu ua lavea uma lava ia ituaiga o gaioiga i lalo o le moliaga o le sauaina o fanau.
O le manatu o nisi, o loo taututu i le lagona e faapea a le sasaina fanau o lona uiga o le a ola i latou i se olaga tuufau. Aua foi o le a le toe popole i le ituaiga o amioga o le a amio ai.
O le a tafilisaunoa e saoloto e fai o mea lelei ma mea leaga aua o lea o le a le toe iai se sasa sa pei o se aoaiga ina ia toe liliu ai le mafaufau pe a faatino, aua e lagona le tiga puupuu.
O le a le toe popole tamaiti pe toe faalogo i o latou matua aua ua iai le latou sulufaiga o le tulafono lea.
Talu ona pasiaina lenei tulafono, e oo mai i le taimi nei o lea lava ua iai nai matua ua tutu i luma o le faamasinoga ma tali atu i o latou moliaga ona o le fasiina o nai a latou fanau.
O ina e faailoa mai ai ua le o toe iai tele se aiatatau i le matua e sopoia ai le ituaiga o aoao sa pei ona faaaogaina ai le sasa.
E ese lava tatou Samoa i le tulaga e pei ona iai lea foi ituaiga o aoaiga.
E taofi nisi o le sasa o se vaega taua lea o le aoaoina o fanau ina ia aua nei toe faaluaina se mea sese sa fai. O nisi foi e tetee i lea itu.
O le latou taofi, e leai se aoaoga e sili atu nai lo le faanofo i lalo o le tama ma le teine ma talanoa i ai.
O le taua o le itu lea, aua e faamalamalama lelei ai lava i tamaiti vaega ua sese ma ua moomia le aoaoina ai, ina ia mautinoa le aua lea nei toe faia i le isi taimi.
E leiloa e le Tusitala poo fea le itu e piitia i lou finagalo. Ae tasi le vaega e fia faamanatu atu, e taua le vaavaai uma i itu e lelei, ma itu e le lelei ai le sasa.
A manino mai tulaga ia, ona le faitioina lea pe o le mea ea o se mea lelei, pe o se mea leaga.
O le fesoasoani foi lena i lenei vaiaso, ina ia aua nei vave ona fai o se faamasinoga, ae lelei le auiliili ma ia faatoaga ona iloilo vaega uma a o lei pine se lagona pe lelei pe leaga foi le sasa.
I le peni lava ia a le Tusitala, e pei e agai i le itu o loo taoto ai le tulafono ma le tuaoi o le sasaina o le fanau.
E lelei le tulafono e pule faamalumalu i le ola ma mea e ao ona fai, atoa ai foi ma mea e le tatau ona fai.
Ae afai loa le tulafono ma faamalosia o le saolotoga ua uma ona tuuina mai e le Atua i le tagata ola e fai ai ana faaiuga, ona faigata loa lea ona taliaina e le Tusitala. O le sasa e aoai ai e pei e iai lona tuaoi. O le sasa lea e fai ma le alofa.
O lona uiga, e po ma talanoa i ai e uiga i le mea sese ua fai. E po ma faamalamalama lelei le leaga o le sese ua faatino. A o lea foi po e le o se po e ao ina faataunuu i foliga.
O loo avanoa le nofoaga sei tulou e po ma ia aua foi nei malosi.
O le sasa e faatino ona o le ita, o ina la e fanau mai ai le sauaina o fanau, aua foi o le sasa lea ua le faia ia aoai ai, ae ua sasa ina ia faamalieina le loto ita ma le loto tiga i le sese ua fai.
O lea la ituaiga sasa e matua le taliaina lava e le Tusitala.
Samoa e, o fanau o le tofi mai le Alii. A sese e faatonu i le sasa alofa ma le upu o le aoaiga. Ae a faatonu loa i le sasa o le ita ma upu masoā, e le pine o le a faigata ona taliaina e fanau lea ituaiga o aoaiga ma o le a fai foi lea ma ala o le a aveseseina ai le sasa o se solitulafono i le tagata.
Ia manuia lava lenei vaiaso i galuega o le a feagai ai ma si o tatou atunuu.