O le a ou le toe tau faafuluina le tia e lele malie, i paia ma mamalu o Samoa i ona tulaga faalupelupeina. Le paia i Aiga ma Tama o Tama foi ma Aiga, ae tainane le mamalu i faleupolu ma failauga, o faletua ma tausi ma le loaloa o si o tatou atunuu.
O outou mamalu maualuga ma paia sautuafafafa o le a le toe taea i se faamatalaga, tulou, tulou, tulouna lava. Ae fiafia lava e avea lenei foi avanoa taua e faatalofa atu ai Samoa i lau faitau mai.
E ioe le talitonuga o loo maualuga pea le alofa o le Atua i lo outou soifua manuia ma le lagi e mama.
Faatalofa atu i susuga i faafeagaiga o loo faapea ona talafaauto aua le tauasuina o le Ipuvai o le Ola i soo se fata faitaulaga.
E ui lava ina lofia le toatele foi o aiga i totonu o Niu Sila nei ona o le valaau paia a le Atua i nisi o tama ma tina matutua, ae o la Iesu Keriso amuia e faanoanoa aua e faamafanafanaina i latou.
O lenei vaiaso ua manatu ai le Tusitala ina ia faasoa atu i nisi foi o suiga o loo iai le Malo Niu Sila. O le mea muamua, e tutupu lava suiga i lea vaiaso ma lea vaiaso, e pei o le upu e masani ai Samoa o le taimi lava ma le mea e tupu ai.
O le vaiaso na tea nei na faamauina ai i suesuega o le tau i tupe maua a lenei foi atunuu, ma faamaonia ai le toe agaigai i luga o le tulaga lelei ua iai foi le tamaoaiga o le lalolagi.
Talu mai le Aso Lulu o le vaiaso na tea nei na iloa ai e foliga mai ua moumou malie atu le tulaga faaletonu, ae o lea ua toe fotuai mai faamanuiaga mo le atunuu. E masalo e faamaonia lea manatu pe a faatusatusa atu i tupe o loo faapea ona lafo i nai aiga i Samoa.
O se matua faaletonu tele na palasi mai ai i lalo le tala Niu Sila pe a faaliliu i le tupe Samoa. I lea faaletonu sa oo ai lava ina pau maualalo i le $1.54 ma o se avega sa toe faaopoopo mai i tauau o nai tagata. Peitai e tapuni fale lafo tupe i Samoa i le Aso Toonai na sei mavae atu nei o loo $1.79 le tala Niu Sila pe a faaliliu i le tala Samoa, o se faamanuiaga lea mo tagata.
I le tilotilo atu i le suiga o le a toe tulai mai ai le lelei o le tamaoaiga e pei ona valoia ai nei e le toatele o atunuu, e foliga mai o le a toe tatala ai le faitotoa e mafai ai ona toe auau le faasoa sa tau posiposi.
I se isi faaupuga, o le a toe iai se vaega tupe o le a mafai ona faasaoina mai i tupe faaalu o le vaiaso pe a fuafua atu i isi masina ua tuanai talu mai ona pau i lalo le tamaoaiga o le atunuu.
Afai la o le ata lea o le a tilotilo atu i ai, o lona uiga Samoa, o le avanoa lelei lenei e toe faaaoga tatau ai lenei suiga ua oo mai.
O le fesili, pe faaaoga tatau faafefea? Ua lava le pau i lalo o le tamaoaiga ma le alu i luga o le tau o le soifuaga e aoaoina ai i tatou i le leaga o le soifua ma le ola le magafagafa sei tulou le mamalu o le aufaitau.
Ua mafua lea tala, ona a o lelei le tamaoaiga o le lalolagi, sa lei lelei ona faatauaina avanoa na maua e sefe ai tupe, e pei o le ola a le tagata poto. Peitai ina ua faaletonu le tala i le tupe o le lalolagi, ona faatoa iloa lea iina le faigata o le ola faatamala.
O le feau o loo momoli mai, e tatau lava ona iai se teugatupe e teu i ai sina seleni i vaiaso taitasi. E le faapea foi o le a teu uma le tupe ae leiloa pe faapefea ona tausi le aiga ma faatino manaoga moomia i totonu o fale i vaiaso taitasi.
Ae a maua le tai limasefulu tala e teu i vaiaso uma, o se amataga lelei tele lea e tua i ai i aso faigata.
E fuafua lava foi i tupe maua, aua e mafai ona faaopoopo atu lea numera i se fuainumera lapoa atu e pei o le onosefulu tala pe sili atu foi, ae o le mea taua o loo maua se tupe o loo teu.
E le gata ina e tatau ona iai se teugatupe, ae ia iai ma se puipuiga i lea teugatupe.
O lona uiga, e le tatau ona tala i tua lea teugatupe ona o ni mea laiti e mafai lava ona fai i tupe maua, ia pe faamisi foi pe afai ua le talafeagai ma tupe faasoasoa lelei o le vaiaso.
O le faalavelave i nai o tatou tagata, e pei e matamuli tele pe a leai se tupe e ave i faalavelave ma saoga poo tusaga o loo sasao mai. O le mea tonu lava lea o loo tulai mai ai se tasi o faafitauli tele i aiga ma tagata o si o tatou atunuu.
Afai o le faaipoipoga e matua sau i luga saogatupe aua le faatinoina o le faaipoipoga, ona fosi lea o le malosi i le maualuga sa lei mafaufauina. Ae ua mafua ona fosi ona o le faaupuga o lau tusaga lena e tatau ona maua mai afea ma afea.
O le fesili, e iai ea se falepuipui e ave i ai oe ma au pe a le lava le ta tusaga? Ou te talitonu e leai. E le faapea la o fautua atu ina ia aua nei faia le tusaga, ae e tilotilo ma fua i luma toe fua foi i tua mea uma vaeane le mamalu o le aufaitau.
O le a le mea ua maua, o le mea sili lena ma e manatu le Tusitala e fiafia foi i ai le Atua. Ae a feausi loa le sailiga, o ina tonu lava o le a tulai mai ai loa le toe faaaoga o le teugatupe lea sa faapolopolo i le faletupe.
E mafua ona tala ona e musu i faapea mai tagata ua leai se tupe o le saofaga ona tupu ai lea o le maasiasi.
E taua le uma o le faaipoipoga fiafia le ulugalii faaipoipo toe fiafia ma tagata sa faatinoina le faaipoipoga.
Ae leaga le uma ane o le ulugalii fou fiafia ma tafafao i tupe e tele na maua i le faaipoipoga, ae safa tagata sa sulu solo ulu e tau sue ni tupe e fai ai le faaipoipoga ona o le musu i le maasiasi, pe e mafua foi ona o le fia fai viiga.
Ia manuia tiute ma faiva o le a feagai ai ma si o tatou atunuu i lenei foi vaiaso i le alofa ma le agalelei o le Atua.
Soifua
