Peni a le Tusitala 27 Iulai 09

E fiafia lava e faatalofa atu Samoa i lenei foi vaiaso. Malo le soifua manuia ma le lagi e mama. Faafetai i le alofa ma le agalelei o le Atua ina ua mafai foi ona toe maua lenei avanoa taua e fesootai ma feiloai ai i luga o tusitusiga e pei ona masani ai i lea vaiaso ma lea vaiaso.
E faatalofa atu i susuga i faafeagaiga ma o latou faletua, o tupu ma tamalii o si o tatou atunuu, ae le gata foi i lea o le paia ma le mamalu lautele o Samoa o fiafia pea e taliaina ma faitau i le tautua atu a le Samoa Times. E faapitoa foi se faatalofa i paaga masani ma i latou ua avea pea ma uo mamae a le tatou nusipepa.
Faamalo le folau i lagi matafi ma le soifua foai mai lo tatou Alii, le Atua o le vavau seia oo i le faavavau.
Ua manatu o le a avea lenei avanoa e faasoa atu ai i le tulaga e pei ona iai vevesiga o loo tulai mai nei i le Super City, pe o le tulaga o le a tuufaatasia ai nei taulaga eseese i totonu o Aukilani ina ia avea ma taulaga e tasi. Ia manatua, o le tausaga fou i le masina o Oketopa lea ua fuafuaina o le a faataunuuina ai lenei faamoemoe pe afai ae iu le faiga filifiliga a le atunuu aua ni sui latou te tauaveina mataupu i totonu o Faigamalo Faaitumalo. E le taumate ua toatele i latou ua iai so latou silafia i le tulaga o le a iai nei lea suiga.
E fai ma faataitaiga o le taulaga i Manukau o le a le toe iai se igoa, Manukau City, o le taulaga i Waitakere o le a le toe iai se igoa Waitakere City, o North Shore ma isi taulaga, ae o le a tasi lava le ta‘uga o Auckland City, pe o le taulaga faatau o Aukilani.
O lenei suiga e pei ona faataoto mai e le faigamalo o loo ua iai nei, ua lagalaga ai finagalo a le toatele, ma faaalia ai ni o latou lava foi lagona e uiga i lenei mataupu. O le popolega o loo iai nei i le manatu o le Tusitala, ona a oo mai le aso e faataunuuina ai lenei suiga, o le a se aafiaga o le a iai tagata atumotu o loo afifio ma papaaao i totonu o Aukilani atoa, faatasi ai ma nai o tatou tagata Samoa? O le mea moni e pei ona faafofoga i ai i le tele o ni isi o polokalame i luga o leitio, ua taumafai ai ni isi o tamalii o si o tatou atunuu ina ia faamalamalama mai vaega e lelei ai lenei faiga, atoa ai ma vaega e le lelei ai.
O le tele foi o nei faamalamalamaga, e foliga mai ai e pei lava o loo mafuli finagalo a le toatele o nei tamalii i itu e le lelei ai.
Sei o tatou vaai lava i le auala e pei ona faailoa mai ai le filifiliina o sui e pei ona faataoto mai e le Malo.
O le finagalo a le Malo ina ia filifili mai sui o le fono faatonu a lenei taulaga fou o Aukilani i totonu o pitonuu uma i Aukilani, e aofia ai le sau mai Papakura sei oo atu i Rodney.
O le faafitauli o le a tulai mai i lenei faiga, o le a utiuti ai se avanoa e tulai mai ai se sui Pasefika aua o le toatele o tagata o loo nonofo i nisi o nei pitonuu, e latou te le iloaina tagata Pasefika aemaise ai lava Samoa.
O le faiga o loo iai nei, e filifili lava e le pitonuu sui o le latou itumalo. Faataitaiga o Magele, e filifili lava e tagata Magele o latou sui e tuuina atu i le Fono Faatonu o le taulaga i Manukau. O le faiga lea sa tele ina maua ai avanoa a nai tagata Pasefika ma Samoa e ofi atu ai i lenei Fono.
O le isi faafitauli i le suiga fou o le a iai nei, o le taugata lea mo nai o tatou tagata atumotu. Afai ae iai se tasi e fia manao e tauva i tofiga e iai le Councilor, ma Community Boards, e mautinoa lava o le a mamafa se avega o le a amoina e lea tagata i le tulaga tau seleni.
O lea tagata o le a tilotilo i le ova atu ma le luaselau afe tala e faatino ai lana faatosina.
E mafai ona e ioe faatasi ma le Tusitala i lea tulaga aua a e faitauina le aofai o aiga i le va lea, e sili atu i le selau afe. Afai lava e lolomi ni pepa faatosina ma tufa atu i nei pusa meli ae o le pepa faatosina e tasi e tasi le tala lona tau, ona iloa ai lea iina le faamaonia o lenei faamatalaga. Ia faamata la e toafia ni isi o tagata atumotu e tele faapena ni a latou tupe.
O lona uiga, e iu ifo foi e nao papalagi lava aua o i latou lea o loo ola faaputu e le pei o tagata atumotu e soifua ma maua tupe i lea aso ma lea aso, ae ua iloa foi le vaega e faaaoga iai tupe.
Afai o ni isi nei o vaega e pei ona taua i luga o le a fai ma atugaluga pe a tuufaatasia Aukilani, aisea lava la e faamamafaina ai fua? O le fesili lea o loo ua fai ma pa pupuni e faapogisaina ai pea manatu o le toatele ma ua pei ai le suiga o le a iai nei ose meanoa e le taua, toe le uiga i le toatele o tagata.
Ae e ao ina silafia, afai ae leai ni sui atumotu pe o sui Samoa foi i totonu o le Fono Faatonu o lenei taulaga fou o le a tuufaatasia, e mautinoa lava o le a leai foi so tatou sao, pe o so tatou leo e ofi atu i le faiga o tonu e manuia ai tatou tagata.
O lona uiga la e matua taua tele le tulai mai o tagata atumotu ma Samoa ina ia lagolagoina vaega e manuia ai o tatou tagata. E moomia le tutu faatasi ma galulue faatasi ina ia tino mai se sao aua lava le lelei ma le lumanai manuia o tagata uma o loo aumau ma papaaao i totonu o Aukilani.
E faapefea la ona faatino lo tatou sao? O le mea e tatau ona faia muamua, o le resitala lea o tagata uma o e ua mafai ona palota ina ia maualafia ai ona fai o lana palota pe a oo mai le masina o Oketopa o le tausaga fou.
O le avea o oe ma tagata palota, o le a mafai ai ona e tetee atu pe a faapalotaina ni isi o faiga fou nei. E taua le iai o so tatou sao. Ae a leai sona faatinoga e ala lea i le faia o le tatou palota, ona leai lea o sona taua.
Ia manuia tele lenei vaiaso ma galuega o loo feagai ai i le alofa ma le agalelei o le Atua.
Soifua