O le a fata pea ia i mauga o ao paia ma mamalu o Samoa i ona tulaga faalupelupeina. Amata mai lava i le taisamasama a le Tuimanua seia savalia Fili ma Puletuu na tauilo ai malo, tulou, tulou, tulouna lava. Tau ia ina ou saua le va ma ou faapoipoi, ae lafoai atu i faleupolu ma failauga, aua o lea lo latou fatu aiga e tausi.
Ae avea ia o lenei avanoa taua e toe faatalofa atu ai foi i le paia ma le mamalu o Samoa, aemaise ai lava le aufaitau o loo fai pea le Samoa Times ma a latou paaga masani i lea vaiaso ma lea vaiaso. E talitonu le manatu o loo maualuga le alofa ma le agalelei o le Atua i lo outou soifua manuia, ia viia ai pea o Ia e faavavau.
E ui lava foi ona o loo feagai ni isi o aiga ma faanoanoaga ona o le malaga a le maliu ma le oti ia afea ai le soifua ua avea ona o le valaau paia a le Atua, ae ioe lava le faamoemoe, o loo falute atu faamafanafanaga a lo tatou Alii i lo outou soifua.
E avea ai foi lenei avanoa taua e faaoo atu ai faamaisega i le faletua malolo manumalo ia Miriama ma le nofoalo, ae tainane o le paia i aiganalua ona o le valaau paia a le Atua i le tama, le susuga i le faafeagaiga malolo manumalo ia Rev Leao Siitia.
E ui ina e le faigofie mafutaga mafana a ua valavala, ae o la matou tatalo ia falute atu faamaisega a lo tatou Tama o i le lagi, ina ia utu ai loifofoga maligi ona o le matuitui tiga o le oti.
Mai le taele o loto o le pulega ma le aufaigaluega a le Samoa Times, matou te faamafanafana atu ma o matou agaga o le alofa ona o mafatiaga.
Ua ou manatu i lenei vaiaso Samoa ina ia avea lenei itulau a le Tusitala e faasoa atu ai i se tasi o vaega o loo faapea ona tulai mai i totonu o aoga, i le va o tama ma teine aoga e pei o le faikegi, taufaifai, tusitusi lima, ma le anoanoai o faafitauli lea e mafai ona faaleoina i le upu Peretania e tasi o le (bullying).
Na ma talanoa ma se tasi o uo ma ia faailoa mai ai le tulaga faigata o loo iai si ana tama teine ona ua aafia tele i nei faiga le sao ma le le lelei.
E ioe le Tusitala, o nei faiga ua fai lea ma pa pupuni o le agai atu o nisi o alo ma fanau i le tulaga maualuga o saiiliiliga sa tatau ona o latou ausia e ala i aoaoga i aso taitasi.
E le gata foi i lea, ae ua avea nei uiga ma ala ua augata ma musua ai nisi o fanau ina ia o i le aoga, aua ua pei le potu aoga o se falepuipui pe a oo ina faafesagai ma nei faiga le lelei. I le faamatalaga a le uo a le Tusitala o si ana tama ua pei ua musu e alu i le aoga ona o nisi o teine ua faatasitasi ma o latou lamaina ia pe a oo ina taunuu atu i le faleaoga.
O nisi o i latou nei ua latou faia ni tala taufaifai ma upu faaamuamu, ma ua avea lea ma ala e tiga ai le loto o si ana tama. Ua faaopopo i nei tiga le loto ma i nei upu ma tala, ona oso ai lea o le le fia alu i se aoga. O se tasi o uiga sa taua e le uo a le Tusitala o le faia lea o ni upu e pei e faafefe ai si ana tama i ni faiga taufaamatau.
O nei uiga e talitonu le Tusitala e le fou lea i totonu o aoga, aemaise lava i aoga maualuluga ma kolisi. O le atugaluga o le Tusitala, ona e le o iloa e tamaiti o loo faia nei uiga vaivai ma le le lelei, le tulaga faaletonu o loo iai le mafaufau o le o loo aafia.
E le gata ina aafia lona mafaufau ma le lelei ai ana faaiuga fai, ae o le a le lelei ai ma lana taumafai i le tulaga tau aoaoga ona ua le tonu ma sao le mafaufau talu ai le maasiasi, o le popole ma le fefe ona o nei faiga mataga o loo faia e i latou o loo tausolomua i nei uiga leaga. O le fesili la, faamata o le a se fofo o lenei faafitauli ina ia aua nei tupu tele ma toe tulai mai?
E leai se tasi e sili ona vavalalata le mafutaga ma tama ma teine aoga e pei o latou lava matua i totonu o aiga. Ua taua lea tulaga aua o le tina lava ma le tama o loo faafeagai pea ma le afafine ma le atalii i aso uma, i le faasauni atu i le aoga ma le toe tuua mai.
Afai lava o loo iai se mafutaga vavalalata lea, o ina foi lea e talitonu le Tusitala e tatau ona foia ai le faafitauli.
Aua foi o le a avea le upu apoapoai a matua i le taeao a o lei tuua e fanau aoga ma faamanatu i o latou mafaufau mea lelei e ao ona fai, ma mea le lelei e le tatau foi ona fai. A malosi la le fautua a matua, e iai le manatu o le a tuumamaina le saga tulai mai o lenei faafitauli.
E taua tele le ave o fautuaga i fanau ma ia aua nei faavaivai le fafaga pea i upu ma tala lelei, aua e maua ai manatu ma mafaufauga lelei a i latou pe a oo i totonu o faleaoga.
Ae mo matua o loo aafia nai o latou fanau i nei faiga e pei o le uo a le Tusitala, ia aua nei vaivai foi lau fautua i lau tama ma ia e toaga e tatalo i le Atua e puipui ia mai nei faiga le lelei i totonu o aoga.
E le gata i lea, ae fautuaina foi ina ia tau i faiaoga pe afai o se faafitauli o loo tulai mai ma aafia ai fanau. Afai e le maua ai se tali, logo le pule aoga. Afai foi e leai, o loo iai le Fono Faatonu a le aoga, o i latou lea o loo pule faamalumalu ina ia faaoo i ai le faasea.
Afai e faigata ona faatoai le faasea ona o le gagana, ia vaai le sui Samoa o loo iai i le Fono Faatonu ina ia faaoo i ai, ina ia mautinoa o loo faia se galuega i tamaiti o loo faia nei uiga mataga ma le saga aafia ai fua o nai fanau o loo fia aoaoina lelei i faleaoga.
Ia manuia lava lenei vaiaso ma galuega o loo feagai ai ma si o tatou atunuu.
Tatou feiloai pea,
Soifua ma ia manuia
